ആൽബർട്ട-സസ്കാച്ചെവൻ അതിർത്തിക്ക് അടുത്ത് ആഞ്ഞടിച്ച ചുഴലിക്കാറ്റിൽ അഞ്ച് പേർക്ക് പരുക്കേറ്റതായി ആർസിഎംപി റിപ്പോർട്ട് ചെയ്തു. ബുധനാഴ്ച രാത്രി 8:30 ഓടെ എഡ്മിന്റനിൽ നിന്നും ഏകദേശം 300 കിലോമീറ്റർ അകലെയുള്ള ഡിൽബെറി ലേക്ക് പ്രൊവിൻഷ്യൽ ക്യാമ്പ്ഗ്രൗണ്ടിലാണ് ടൊർണാഡോ ആഞ്ഞടിച്ചത്.
42 ക്യാമ്പിംഗ് സൈറ്റുകളാണ് സംഭവസമയത്ത് ഉണ്ടായിരുന്നത്. ശക്തമായ കാറ്റിൽ ക്യാമ്പ്ഗ്രൗണ്ടിലെ ട്രെയിലറുകൾക്ക് കാര്യമായ നാശനഷ്ടമുണ്ടായി, ചിലത് പൂർണ്ണമായും നശിച്ചു. സംഭവത്തിൽ അഞ്ച് പേർക്ക് പരുക്കേറ്റിട്ടുണ്ട്. ഇവരിൽ മൂന്നു പേരെ ആശുപത്രിയിൽ പ്രവേശിപ്പിച്ചു. ഇവരുടെ നിലവിലെ അവസ്ഥ വ്യക്തമല്ല.
