അയോധ്യയിലെ ശ്രീരാമജന്മഭൂമി തീർഥ ക്ഷേത്ര ട്രസ്റ്റിലേക്ക് ഭക്തർ നൽകിയ സംഭാവനകളിൽ വൻ തിരിമറി നടന്നതായാണ് പുതിയ അന്വേഷണ റിപ്പോർട്ടുകൾ സൂചിപ്പിക്കുന്നത്. പ്രതിദിനം ശരാശരി ആറ് മുതൽ എട്ട് ലക്ഷം രൂപ വരെ ഇവിടെ നിന്നും തട്ടിയെടുക്കപ്പെട്ടിരുന്നു എന്ന് ബാങ്ക് ജീവനക്കാരിൽ നിന്ന് ലഭിച്ച വിവരങ്ങളുടെ അടിസ്ഥാനത്തിൽ എൻഡിടിവി റിപ്പോർട്ട് ചെയ്യുന്നു. തട്ടിപ്പ് വെളിച്ചത്തുവരുന്നതിന് മുൻപ് ട്രസ്റ്റിന്റെ ബാങ്ക് അക്കൗണ്ടുകളിലേക്ക് ദിവസേന 16 മുതൽ 18 ലക്ഷം രൂപ വരെയാണ് എത്തിയിരുന്നതെങ്കിൽ, അന്വേഷണം ആരംഭിച്ചതോടെ ഈ തുക ഒറ്റയടിക്ക് 24 മുതൽ 26 ലക്ഷം രൂപയായി ഉയർന്നു. ഇതിൽ നിന്നുതന്നെ ദിവസേന ലക്ഷക്കണക്കിന് രൂപയുടെ ചോർച്ച സംഭാവന പണത്തിൽ ഉണ്ടായിട്ടുണ്ടെന്ന് അന്വേഷണസംഘം സ്ഥിരീകരിക്കുന്നു.
ക്ഷേത്രത്തിലെ നാല് പെട്ടികളിൽ ശേഖരിക്കപ്പെടുന്ന പണം എണ്ണി തിട്ടപ്പെടുത്തുന്നതിനുള്ള മേൽനോട്ട ചുമതല സ്റ്റേറ്റ് ബാങ്ക് ഓഫ് ഇന്ത്യയ്ക്കാണ് (SBI). ഇതിനായി ഒരു സ്വകാര്യ ഏജൻസിയെയും 11 ബാങ്ക് ജീവനക്കാരും മൂന്ന് ട്രസ്റ്റ് അംഗങ്ങളും ഉൾപ്പെടുന്ന പതിനാലംഗ പ്രത്യേക സംഘത്തെയും നിയോഗിച്ചിരുന്നു. എന്നാൽ ഈ എണ്ണൽ പ്രക്രിയയ്ക്ക് നേതൃത്വം നൽകിയ വിരമിച്ച ബാങ്ക് ജീവനക്കാരൻ സുഭാഷ് ശ്രീവാസ്തവ തന്നെയാണ് ഈ കേസിലെ പ്രധാന പ്രതികളിലൊരാൾ. പണം സുരക്ഷിതമായി ബാങ്കിലേക്ക് എത്തിക്കേണ്ട ഉത്തരവാദിത്തം ഇദ്ദേഹത്തിനായിരുന്നു. കഴിഞ്ഞ ഫെബ്രുവരിയിൽ പണം എണ്ണുന്ന സംഘത്തിലെ മറ്റൊരു ജീവനക്കാരൻ മോഷണ വിവരത്തെക്കുറിച്ച് സൂചിപ്പിച്ചപ്പോൾ, “ദൈവം എല്ലാം കാണുന്നുണ്ട്, ഇത് നമ്മുടെ ആരുടെയും വീട്ടിൽ നിന്നുള്ള പണമല്ലല്ലോ” എന്നായിരുന്നു സുഭാഷിന്റെ വിചിത്രമായ പ്രതികരണം.
കേസുമായി ബന്ധപ്പെട്ട് ചില എസ്ബിഐ ജീവനക്കാരുടെ പങ്കിനെക്കുറിച്ചും നിലവിൽ പോലീസ് അന്വേഷണം നടത്തിവരികയാണ്. വിപുലമായ സാമ്പത്തിക ഇടപാടുകളും കള്ളപ്പണം വെളുപ്പിക്കൽ സാധ്യതകളും പരിശോധിക്കുന്നതിനായി അയോധ്യ പോലീസ് എൻഫോഴ്സ്മെന്റ് ഡയറക്ടറേറ്റിന്റെ (ED) സഹായവും തേടിയിട്ടുണ്ട്. കേസ് അന്വേഷിക്കുന്ന പ്രത്യേക അന്വേഷണ സംഘം (SIT) ഇതുവരെ എട്ട് പേരെയാണ് ഈ സംഭവവുമായി ബന്ധപ്പെട്ട് അറസ്റ്റ് ചെയ്തിരിക്കുന്നത്.
