ലോകകപ്പ് ആവേശം കൊടുമുടിയിലെത്തി നിൽക്കെ, ലയണൽ മെസ്സിയോടുള്ള ആരാധന മൂത്ത് തന്‍റെ ക്ലിനിക്കിനെ മെസ്സി മ്യൂസിയമാക്കി മാറ്റി ഡാലസിലുള്ള അർജന്റീനൻ വംശജനായ ഡോക്ടർ. നോർത്ത് ഡാലസിൽ പ്രാക്ടീസ് ചെയ്യുന്ന ഡോ. ഗുസ്താവോ ഡേ (61) ആണ് തന്‍റെ ക്ലിനിക്കിന്‍റെ ചുവരുകളും ഇടനാഴികളും മെസ്സിയുടെ ചിത്രങ്ങളും അർജന്റീനൻ പതാകകളും കൊണ്ട് അലങ്കരിച്ചത്.
മെസ്സിയുടെ കരിയറിലെ സുപ്രധാന നിമിഷങ്ങളുടെ ചിത്രങ്ങളും സ്മരണികകളും ഇവിടെ സൂക്ഷിച്ചിട്ടുണ്ട്. ക്ലിനിക്കിലെ പന്ത്രണ്ടോളം പരിശോധനാ മുറികളിലേക്ക് പോകുന്ന വഴിയിലുടനീളം മെസ്സി പ്രഭാവം ദൃശ്യമാണ്. തന്‍റെ മക്കളോടൊപ്പം ചേർന്നാണ് ഡോക്ടർ ഈ ‘മെസ്സി മ്യൂസിയം’ ഒരുക്കിയിരിക്കുന്നത്. ലോകകപ്പ് മത്സരങ്ങൾ നടക്കുന്ന ഡാലസിൽ ഈ ക്ലിനിക്കും ഇപ്പോൾ ഫുട്ബോൾ പ്രേമികളുടെ പ്രധാന ആകർഷണമായി മാറിയിരിക്കുകയാണ്.
