യുഎസിലെ ന്യൂവാർക്കിൽ നിന്ന് ഹാലിഫാക്സിലേക്ക് പുറപ്പെട്ട എയർ കാനഡ വിമാനം, പൈലറ്റിന് ആരോഗ്യപ്രശ്‌നങ്ങൾ നേരിട്ടതിനെ തുടർന്ന് ബോസ്റ്റൺ ലോഗൻ അന്താരാഷ്ട്ര വിമാനത്താവളത്തിൽ അടിയന്തര ലാൻഡിംഗ് നടത്തി. ബുധനാഴ്ച ഉച്ചയ്ക്ക് പ്രാദേശിക സമയം ഏകദേശം 1:40 ഓടെയായിരുന്നു സംഭവം. എയർ കാനഡയുടെ AC7664 വിമാനമാണ് അടിയന്തരമായി ബോസ്റ്റണിലിറക്കിയത്.

സുരക്ഷാ മാനദണ്ഡങ്ങൾ പാലിച്ച് പൈലറ്റിനെ കോക്ക്പിറ്റിൽ നിന്നും മാറ്റിയതായി എയർ കാനഡ വക്താവ് അറിയിച്ചു. തുടർന്ന് ഫസ്റ്റ് ഓഫീസർ വിമാനത്തിന്‍റെ നിയന്ത്രണം ഏറ്റെടുക്കുകയും ബോസ്റ്റണിലേക്ക് തിരിച്ചുവിട്ട് സുരക്ഷിതമായി നിലത്തിറക്കുകയും ചെയ്തു. വിമാനത്താവളത്തിൽ എത്തിച്ചയുടൻ തന്നെ പൈലറ്റിനെ വിദഗ്ദ്ധ ചികിത്സയ്ക്കായി പ്രാദേശിക ആശുപത്രിയിലേക്ക് മാറ്റിയതായി മസാചുസെറ്റ്‌സ് സ്റ്റേറ്റ് പോലീസ് സ്ഥിരീകരിച്ചു. ഈ സമയത്ത് വിമാനത്തിൽ 61 യാത്രക്കാരാണ് ഉണ്ടായിരുന്നത്. വിമാനത്തിലുണ്ടായിരുന്ന എല്ലാ യാത്രക്കാരും സുരക്ഷിതരാണെന്ന് അധികൃതർ അറിയിച്ചു.