വിരമിച്ചവർ, ഭിന്നശേഷിക്കാർ, ആശ്രിതർ എന്നിവരുൾപ്പെടെ രാജ്യത്തെ ദശലക്ഷക്കണക്കിന് കനേഡിയൻ പൗരന്മാർക്കുള്ള കാനഡ പെൻഷൻ പ്ലാൻ (സി.പി.പി) ജൂൺ 26-ന് അക്കൗണ്ടിലേക്ക് എത്തുമെന്ന് കാനഡ റവന്യൂ ഏജൻസി (CRA) അറിയിച്ചു. നിലവിൽ, 65-ാം വയസ്സിൽ വിരമിച്ചവർക്ക് പ്രതിമാസം ശരാശരി 925.35 ഡോളറും പൂർണ്ണ സംഭാവന നൽകിയവർക്ക് പരമാവധി 1,507.65 ഡോളർ വരെയും ലഭിക്കും. ഭിന്നശേഷിയുള്ളവർക്ക് ഡിസബിലിറ്റി ബെനിഫിറ്റ് ആയി പരമാവധി 1,741.20 ഡോളറാണ് ലഭിക്കുക.
60 വയസ്സ് പൂർത്തിയായവർക്കും തൊഴിൽ കാലയളവിൽ ഒരു തവണയെങ്കിലും സി.പി.പി വിഹിതം അടച്ചവർക്കുമാണ് കാനഡ പെൻഷൻ പ്ലാന് അപേക്ഷിക്കാൻ അർഹതയുള്ളത്. 65 വയസ്സിന് മുമ്പ് പെൻഷൻ കൈപ്പറ്റിയാൽ പ്രതിമാസ തുക സ്ഥിരമായി കുറയും. എന്നാൽ 70 വയസ്സ് വരെ കാത്തിരുന്നാൽ തുക വർധിക്കുകയും ചെയ്യും. കാനഡയിൽ പുതുതായി ജോലിയിൽ പ്രവേശിക്കുന്ന കുടിയേറ്റക്കാർക്കും വർഷത്തിൽ 3,500 ഡോളറിലധികം വരുമാനമുണ്ടെങ്കിൽ ആദ്യ ശമ്പളം മുതൽ ഈ പദ്ധതിയുടെ ഭാഗമാകാം. ജൂലൈ 29, ഓഗസ്റ്റ് 27, സെപ്റ്റംബർ 25, ഒക്ടോബർ 28, നവംബർ 26, ഡിസംബർ 22 എന്നീ തീയതികളിലാണ് ഇനി കാനഡ പെൻഷൻ പ്ലാൻ വിതരണം ചെയ്യുക.
