വേനൽക്കാലത്ത് ചൂടിൽ നിന്ന് രക്ഷനേടാനായി ബോ, എൽബോ നദികളിലിറങ്ങുന്നവർ സുരക്ഷാ മുൻകരുതലുകൾ സ്വീകരിക്കണമെന്ന് കാൽഗറി പൊലീസ് മുന്നറിയിപ്പ് നൽകി. ഓരോ വേനൽക്കാലത്തും ജലാശയങ്ങളുമായി ബന്ധപ്പെട്ടുള്ള അപകടങ്ങൾ ഏറ്റവും കൂടുതൽ ഉണ്ടാകുന്നത് ജൂലൈ മാസത്തിലാണ്. എന്നാൽ, ശ്രദ്ധയോടെ കൃത്യമായി സുരക്ഷാ മുൻകരുതലുകൾ സ്വീകരിച്ചാൽ അപകടങ്ങൾ ഒഴിവാക്കാൻ സാധിക്കുമെന്ന് കാൽഗറി ഫയർ ഫോഴ്സ് ഉദ്യോഗസ്ഥർ വ്യക്തമാക്കി.
ലൈഫ് ജാക്കറ്റ് ധരിക്കാതിരിക്കുക, തണുത്ത വെള്ളത്തിൽ ദീർഘനേരം കഴിയുക, മദ്യപിച്ചോ മറ്റ് ലഹരിപദാർത്ഥങ്ങൾ ഉപയോഗിച്ചോ വെള്ളത്തിലിറങ്ങുക എന്നിവയാണ് ജലാശയങ്ങളിലെ മരണങ്ങൾക്ക് കാരണമാകുന്ന പ്രധാന കാരണങ്ങൾ. വെള്ളത്തിലിറങ്ങുമ്പോൾ ലൈഫ് ജാക്കറ്റ് നിർബന്ധമായും ധരിക്കുക, നീന്തൽ പഠിക്കുക തുടങ്ങിയ ലളിതമായ സുരക്ഷാ മാർഗ്ഗങ്ങൾ പാലിക്കണമെന്ന് നഗരസഭാ അധികൃതർ ജനങ്ങളോട് അഭ്യർത്ഥിച്ചു.
