ലോകത്തിലെ ഏറ്റവും സമാധാനപൂർണ്ണമായ 20 രാജ്യങ്ങളുടെ പട്ടികയിൽ സ്ഥാനം നിലനിർത്തി കാനഡ. 2026-ലെ ഗ്ലോബൽ പീസ് ഇൻഡക്സ് റിപ്പോർട്ട് പ്രകാരം കാനഡ പതിനാലാം സ്ഥാനത്താണ്. 1.525 പീസ് സ്കോറാണ് കാനഡയ്ക്ക് ഉള്ളത്. എന്നാൽ 2025-ൽ രാജ്യത്തിൻ്റെ സ്കോർ 1.491 ആയിരുന്നു. രാജ്യത്തെ വ്യക്തിഗത സുരക്ഷിതത്വവും സുരക്ഷാ മാനദണ്ഡങ്ങളും മെച്ചപ്പെട്ടതായി റിപ്പോർട്ടിൽ പറയുന്നു. എന്നാൽ, കാനഡയിൽ അക്രമസ്വഭാവമുള്ള പ്രതിഷേധങ്ങളും പ്രകടനങ്ങളും വർധിച്ചതായി റിപ്പോർട്ട് ചൂണ്ടിക്കാട്ടി. ആഭ്യന്തര സംഘർഷങ്ങളും മുൻവർഷങ്ങളെ അപേക്ഷിച്ച് വഷളായിട്ടുണ്ട്. എന്നാൽ ആഗോളതലത്തിൽ ഏറ്റവും സമാധാനമുള്ള രാജ്യമായി ഐസ്‌ലാൻഡ് ഒന്നാം സ്ഥാനം നിലനിർത്തി. ന്യൂസിലാൻഡ് ആണ് പട്ടികയിൽ രണ്ടാം സ്ഥാനത്തുള്ളത്. സമാധാന അന്തരീക്ഷം ഏറ്റവും കുറഞ്ഞ രാജ്യമായി 163-ാം സ്ഥാനത്ത് റഷ്യ തുടരുന്നു.
അതേസമയം ആഗോള സമാധാന സൂചികയിൽ വൻ തിരിച്ചടിയാണ് യുണൈറ്റഡ് സ്റ്റേറ്റ്സിന് നേരിടേണ്ടി വന്നത്. കഴിഞ്ഞ വർഷത്തെ പട്ടികയിൽ 128-ാം സ്ഥാനത്തായിരുന്ന അമേരിക്ക ഈ വർഷം 134-ാം സ്ഥാനത്തേക്ക് പിന്തള്ളപ്പെട്ടു. നിലവിൽ 2.535 പീസ് സ്കോറാണ് അമേരിക്ക രേഖപ്പെടുത്തിയിരിക്കുന്നത്. വളരെ കുറഞ്ഞ സമാധാന അന്തരീക്ഷം മാത്രമുള്ള രാജ്യമായാണ് ഇപ്പോൾ അമേരിക്കയെ ഈ ആഗോള സൂചികയിൽ അടയാളപ്പെടുത്തിയിരിക്കുന്നത്.
