മാഗഡി റോഡിനെയും മൈസൂരു റോഡിനെയും തമ്മിൽ ബന്ധിപ്പിച്ചുകൊണ്ട് ചല്ലഘട്ട നാദപ്രഭു കെമ്പഗൗഡ ലേഔട്ടിലൂടെ കടന്നുപോകുന്ന പുതിയ 10 വരി പാത അടുത്ത മാസം ഗതാഗതത്തിനായി തുറന്നുനൽകും. നൈസ് (NICE) റോഡിന് ഒരു മികച്ച ബദലായി ബെംഗളൂരു വികസന അതോറിറ്റി (BDA) വികസിപ്പിച്ചെടുത്ത ഈ 10.7 കിലോമീറ്റർ പാത പൂർണ്ണമായും ടോൾ രഹിതമാണ് എന്നതാണ് ഏറ്റവും വലിയ പ്രത്യേകത. ചല്ലഘട്ട മെട്രോ സ്റ്റേഷന് സമീപത്ത് നിന്നും ആരംഭിച്ച് കഡംബഗരെയിൽ മാഗഡി റോഡുമായി സംഗമിക്കുന്ന ഈ പുതിയ പാത നിലവിലെ യാത്രാസമയം ഒന്നര മണിക്കൂറിൽ നിന്നും വെറും 15 മിനിറ്റായി ചുരുക്കാൻ സഹായിക്കും.
ബെംഗളൂരുവിന്റെ പടിഞ്ഞാറൻ മേഖലകളിൽ നിന്നുള്ള യാത്രക്കാർക്ക് ട്രാഫിക് ബ്ലോക്കുകളിൽ പെടാതെ ബെംഗളൂരു-മൈസൂരു എക്സ്പ്രസ് വേയിലേക്ക് എളുപ്പത്തിൽ പ്രവേശിക്കാൻ ഈ റോഡ് സഹായിക്കും. കൂടാതെ നിർദിഷ്ട ബെംഗളൂരു വ്യവസായ ഇടനാഴിയുമായും ഇത് ബന്ധിപ്പിക്കുന്നുണ്ട്. 6 വരി പ്രധാന റോഡും ഇരുവശങ്ങളിലുമായി 4 വരി സർവീസ് റോഡുകളും ഉൾപ്പെടുന്നതാണ് ഈ പത്തുവരിപ്പാത. സുരക്ഷിതമായ യാത്ര ഉറപ്പാക്കാൻ 80 കിലോമീറ്റർ വേഗപരിധി നിശ്ചയിച്ചിട്ടുള്ള ഈ റോഡിൽ 64 ചെറുപാലങ്ങളും, 3 അടിപ്പാതകളും, 250 മീറ്റർ നീളമുള്ള ഒരു തുരങ്കപാതയും ഒരുക്കിയിട്ടുണ്ട്. ഇതിനുപുറമേ 1.4 മീറ്റർ വീതിയിൽ സൈക്കിൾ ട്രാക്കിന്റെയും നടപ്പാതയുടെയും നിർമാണപ്രവർത്തനങ്ങളും ദ്രുതഗതിയിൽ പുരോഗമിക്കുകയാണ്.
അടിസ്ഥാന സൗകര്യ വികസനത്തോടൊപ്പം പരിസ്ഥിതി സംരക്ഷണത്തിനും ഈ പദ്ധതിയിൽ വലിയ പ്രാധാന്യം നൽകിയിട്ടുണ്ട്. 4500 ഏക്കറിലായി പരന്നുകിടക്കുന്ന കെമ്പഗൗഡ ലേഔട്ടിന്റെ വിവിധ ഘട്ടങ്ങളിലായി റോഡിന്റെ ഇരുവശങ്ങളിലും ഏതാണ്ട് 6000 മരങ്ങൾ വെച്ചുപിടിപ്പിക്കുന്ന ജോലികൾ ബി.ഡി.എ ആരംഭിച്ചുകഴിഞ്ഞു. ഇതിന്റെ ഭാഗമായി സ്വാഭാവിക വനവൽക്കരണ രീതിയായ ‘മിയാവാക്കി’ കാടുകളും ഇവിടെ വച്ചുപിടിപ്പിക്കുന്നുണ്ട്. പരിസ്ഥിതി ദിനാചരണത്തിന്റെ ഭാഗമായി ഒരു മാസത്തിനകം ഈ പച്ചത്തുരുത്തുകളുടെ നിർമാണം പൂർത്തിയാക്കുമെന്നും, വെച്ചുപിടിപ്പിക്കുന്ന മരങ്ങളുടെ തുടർസംരക്ഷണം കൃത്യമായി ഉറപ്പാക്കുമെന്നും അധികൃതർ വ്യക്തമാക്കി.
