ലോക്സഭാ സീറ്റുകളുടെ എണ്ണം വർദ്ധിപ്പിക്കുന്നതിനും വനിതാ സംവരണം നടപ്പിലാക്കുന്നതിനുമുള്ള പുതിയ ഭരണഘടനാ ഭേദഗതി ബിൽ പാർലമെന്റിന്റെ വർഷകാല സമ്മേളനത്തിൽ അവതരിപ്പിക്കാൻ കേന്ദ്ര സർക്കാർ ഒരുങ്ങുന്നു. കഴിഞ്ഞ ഏപ്രിലിൽ ലോക്സഭയിൽ പരാജയപ്പെട്ട ബില്ലാണ്, ആവശ്യമായ മാറ്റങ്ങളോടെ രണ്ടു മാസത്തിനു ശേഷം സർക്കാർ വീണ്ടും കൊണ്ടുവരുന്നത്.

കേന്ദ്ര സർക്കാർ കൊണ്ടുവരാൻ ഉദ്ദേശിക്കുന്ന പുതിയ ഭരണഘടനാ ഭേദഗതി ബില്ലിൽ വിപ്ലവകരമായ മാറ്റങ്ങളും സവിശേഷതകളുമാണ് ഉൾപ്പെടുത്തിയിരിക്കുന്നത്. ഇതിൽ പ്രധാനമായും ലോക്സഭയിലെ പരമാവധി സീറ്റുകളുടെ എണ്ണം നിലവിലുള്ള 550-ൽ നിന്നും 850 ആയി ഉയർത്താൻ വ്യവസ്ഥ ചെയ്യുന്നു. എന്നാൽ, ഇത്തരത്തിൽ സീറ്റുകൾ വർദ്ധിപ്പിക്കുമ്പോൾ സംസ്ഥാനങ്ങൾക്കിടയിലെ വിഭജനം നിലവിലുള്ളതുപോലെ 1971-ലെ ജനസംഖ്യാ കണക്കെടുപ്പ് പ്രകാരം തന്നെയായിരിക്കും നിലനിർത്തുക. ഉത്തരേന്ത്യൻ സംസ്ഥാനങ്ങളെ അപേക്ഷിച്ച് ജനസംഖ്യാ നിയന്ത്രണം വിജയകരമായി നടപ്പാക്കിയ ദക്ഷിണേന്ത്യൻ സംസ്ഥാനങ്ങൾക്ക് പാർലമെന്റിൽ പ്രാതിനിധ്യം കുറഞ്ഞുപോകുമെന്ന ഭീതി ഒഴിവാക്കാനാണ് ഈ നിർണ്ണായക തീരുമാനം എടുത്തിട്ടുള്ളത്. കൂടാതെ, ഈ ഭരണഘടനാ ഭേദഗതി പാസാക്കിയ ശേഷം ഒരു പ്രത്യേക കമ്മീഷനെ നിയോഗിച്ച് മണ്ഡലങ്ങളുടെ അതിർത്തി നിർണ്ണയിക്കുന്ന (Delimitation) നടപടികളിലേക്ക് കടക്കും. സംസ്ഥാനങ്ങൾക്കുള്ളിലെ നിയമസഭാ മണ്ഡലങ്ങളുടെ വിഭജനത്തിനായി 2011-ലെ സെൻസസ് മാനദണ്ഡമാക്കാനാണ് ഇതിൽ സാധ്യത കൽപ്പിക്കുന്നത്.

പ്രതിപക്ഷ പിന്തുണയ്ക്കായി ചർച്ചകൾ:

ബില്ലിനെ മുൻപ് എതിർത്തിരുന്ന പ്രതിപക്ഷ പാർട്ടികളായ ഡി.എം.കെ, തൃണമൂൽ കോൺഗ്രസ് എന്നിവരുമായി സർക്കാർ ചർച്ചകൾ നടത്തിവരികയാണ്. തമിഴ്നാട് നിയമസഭാ തിരഞ്ഞെടുപ്പിലെ തിരിച്ചടിയുടെ പശ്ചാത്തലത്തിൽ ഡി.എം.കെയിൽ നിന്നും, ചില എം.പിമാരുടെ രാജിയെത്തുടർന്ന് തൃണമൂൽ കോൺഗ്രസിൽ നിന്നും അനുകൂല നിലപാട് ഉണ്ടായേക്കുമെന്നാണ് കേന്ദ്രത്തിന്റെ കണക്കുകൂട്ടൽ.

2029-ഓടെ രാജ്യത്ത് ‘ഒരു രാജ്യം ഒരു തിരഞ്ഞെടുപ്പ്‘ പദ്ധതി യാഥാർത്ഥ്യമാക്കുന്നതിനും മണ്ഡല പുനർനിർണ്ണയ പ്രക്രിയകൾ വേഗത്തിലാക്കുന്നതിനുമുള്ള നീക്കങ്ങളുടെ ഭാഗമായാണ് കേന്ദ്ര സർക്കാർ ഈ ബില്ലിന് മുൻഗണന നൽകുന്നത്.