മുംബൈ: മുംബൈയിലെ എൻ.എസ്.സി.ഐ (NSCI) ഡോമിൽ നടന്ന സംഗീത പരിപാടിക്കിടെ 28 വയസുകാരനായ നിയമ വിദ്യാർത്ഥി കുഴഞ്ഞുവീണ് മരണപ്പെട്ടു. വൃഷഭ് ഗംഗുർഡെ എന്ന യുവാവാണ് ശനിയാഴ്ച വൈകിട്ടുണ്ടായ അപകടത്തിൽ ജീവന് വെടിഞ്ഞത്.
മുംബൈയിലെ സംഗീത നിശ ആസ്വദിക്കുന്നതിനിടയിൽ പെട്ടെന്ന് കുഴഞ്ഞുവീണ വൃഷഭിനെ ഉടനടി ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. അമിതമായി മദ്യം ഉള്ളിൽച്ചെന്നതാണ് മരണകാരണമെന്നാണ് പോലീസിന്റെ പ്രാഥമിക വിലയിരുത്തൽ. മദ്യത്തിന് പുറമെ യുവാവ് മറ്റേതെങ്കിലും തരത്തിലുള്ള ലഹരിമരുന്നുകൾ ഉപയോഗിച്ചിരുന്നോ എന്നും പോലീസ് സംശയിക്കുന്നുണ്ട്. എന്നാൽ, പോസ്റ്റ്മോർട്ടം റിപ്പോർട്ട് പുറത്തുവന്നതിനു ശേഷം മാത്രമേ യഥാർത്ഥ മരണകാരണത്തിൽ വ്യക്തത ലഭിക്കൂ എന്ന് വ്യക്തമാക്കിയ പോലീസ് സംഭവത്തിൽ വിശദമായ അന്വേഷണം ആരംഭിച്ചിട്ടുണ്ട്.
സംഗീത നിശയിൽ 31കാരിയായ ഒരു യുവതിയ്ക്കും ആരോഗ്യപ്രശ്നങ്ങൾ ഉണ്ടായതായി റിപ്പോർട്ടുണ്ട്. മദ്യവും എനർജി ഡ്രിങ്കും കഴിച്ചതിനു പിന്നാലെയാണ് യുവതിയ്ക്ക് അസ്വസ്ഥതയുണ്ടായത്. യുവതി ആശുപത്രിയിൽ ചികിത്സയിലാണ്. താൻ ലഹരിമരുന്ന് ഉപയോഗിച്ചിരുന്നില്ലെന്ന് യുവതി പൊലീസിന് മൊഴി നൽകിയിട്ടുണ്ട്.
