ആഗോള സാഹചര്യങ്ങളിലെ മാറ്റങ്ങളും ജീവിതച്ചെലവ് വർദ്ധിക്കുന്നതും കാനഡയിലെ മുതിർന്ന പൗരന്മാർ ഉൾപ്പെടെയുള്ള പലരെയും സാമ്പത്തിക പ്രതിസന്ധിയിലാക്കുന്നുണ്ട്. ഇതിന് പരിഹാരമായി, ശക്തമായ സാമ്പത്തിക അടിത്തറ കെട്ടിപ്പടുക്കാനും മുതിർന്ന പൗരന്മാരുടെ ജീവിതനിലവാരം മെച്ചപ്പെടുത്താനുമുള്ള ശ്രമങ്ങളിലാണ് ഗവൺമെന്റ്. ഇതിനായി നടപ്പിലാക്കുന്ന ‘ന്യൂ ഹൊറൈസൺസ് ഫോർ സീനിയേഴ്സ് പ്രോഗ്രാം’ (NHSP) മുതിർന്ന പൗരന്മാർക്ക് സമൂഹത്തിൽ സജീവമായി ഇടപെടാനുള്ള നിരവധി അവസരങ്ങൾ സൃഷ്ടിക്കുന്നു.
മുതിർന്ന പൗരന്മാരുടെ ക്ഷേമകാര്യ സെക്രട്ടറി സ്റ്റെഫാനി മക്ലീൻ, ഈ പദ്ധതിക്ക് കീഴിലുള്ള കമ്മ്യൂണിറ്റി പ്രോജക്ടുകൾക്കായുള്ള 2026-27 വർഷത്തെ അപേക്ഷകൾ ക്ഷണിച്ചതായി പ്രഖ്യാപിച്ചു. ഇത്തവണത്തെ ഫണ്ടിംഗ് പ്രക്രിയയിൽ ഗവൺമെന്റ് പ്രധാനപ്പെട്ട ചില മാറ്റങ്ങൾ വരുത്തിയിട്ടുണ്ട്. ഒരു പ്രോജക്റ്റിന് നൽകുന്ന പരമാവധി ഗ്രാന്റ് തുക 50,000 ഡോളറായി ഉയർത്തിക്കൊണ്ട് ധനസഹായം വർദ്ധിപ്പിച്ചതാണ് ഇതിൽ ആദ്യത്തേത്; എങ്കിലും ഇതിൽ മൂലധന സഹായത്തിനുള്ള ചിലവ് 25,000 ഡോളറായി പരിമിതപ്പെടുത്തിയിരിക്കുന്നു. കൂടാതെ, മുതിർന്ന പൗരന്മാരുടെ ക്ഷേമത്തിനായി പ്രാഥമികമായി പ്രവർത്തിക്കുന്ന സംഘടനകൾക്ക് മുൻഗണന നൽകുന്നതിനായി പുതിയ വിലയിരുത്തൽ മാനദണ്ഡം ഏർപ്പെടുത്തിയിട്ടുണ്ട്. ഈ പദ്ധതിയിലേക്ക് അപേക്ഷിക്കുന്ന സംഘടനകൾക്ക് കാനഡ റവന്യൂ ഏജൻസിയുടെ (CRA) ബിസിനസ്സ് നമ്പർ ഉണ്ടായിരിക്കേണ്ടത് ഇനിമുതൽ നിർബന്ധമാണ്. അപേക്ഷകൾ പൂർണ്ണമായും ‘ഗ്രാന്റ്സ് ആൻഡ് കോൺട്രിബ്യൂഷൻസ് ഓൺലൈൻ സർവീസസ്’ (GCOS) പോർട്ടൽ വഴി വേണം സമർപ്പിക്കാൻ, എങ്കിലും പ്രത്യേകമായി ആവശ്യപ്പെടുന്നവർക്ക് മറ്റ് രീതികളിലൂടെയും അപേക്ഷിക്കാൻ അനുമതി നൽകുന്നതാണ്.
ഈ മാറ്റങ്ങൾ ഉടനടി പ്രാബല്യത്തിൽ വരും. അപേക്ഷകൾ സമർപ്പിക്കാനുള്ള അവസാന തീയതി 2026 ജൂലൈ 14 ആണ്.
മുതിർന്ന പൗരന്മാർക്കായുള്ള ഈ കമ്മ്യൂണിറ്റി പ്രോഗ്രാം പ്രധാനമായും അഞ്ച് ലക്ഷ്യങ്ങളെ മുൻനിർത്തിയാണ് പ്രവർത്തിക്കുന്നത്. മുതിർന്ന പൗരന്മാർക്കും പുതിയ തലമുറയ്ക്കും ഇടയിൽ സന്നദ്ധസേവനം (Volunteering) പ്രോത്സാഹിപ്പിക്കുക, മറ്റുള്ളവർക്ക് മാർഗ്ഗനിർദ്ദേശങ്ങൾ നൽകിക്കൊണ്ട് മുതിർന്ന പൗരന്മാരെ സമൂഹത്തിൽ കൂടുതൽ സജീവമാക്കുക എന്നിവ ഇതിൽ ഉൾപ്പെടുന്നു. കൂടാതെ, സാമ്പത്തിക ചൂഷണം ഉൾപ്പെടെയുള്ള മുതിർന്നവർക്കെതിരെയുള്ള അതിക്രമങ്ങളെക്കുറിച്ച് സമൂഹത്തിൽ അവബോധം വളർത്താനും, മുതിർന്ന പൗരന്മാരുടെ സാമൂഹിക പങ്കാളിത്തവും ഉൾപ്പെടുത്തലും ഉറപ്പാക്കാനും ഈ പദ്ധതി ലക്ഷ്യമിടുന്നു. മുതിർന്നവർക്കായി നിലവിലുള്ളതും പുതുതായി ആരംഭിക്കുന്നതുമായ വിവിധ കമ്മ്യൂണിറ്റി പ്രോജക്ടുകൾക്ക് ആവശ്യമായ സാമ്പത്തിക സഹായം നൽകുക എന്നതും ഈ പ്രോഗ്രാമിന്റെ പ്രധാന ചുമതലയാണ്.
മുതിർന്ന പൗരന്മാരുടെ ജീവിതം കൂടുതൽ എളുപ്പമാക്കാൻ കാനഡ ഗവൺമെന്റ് നിരവധി പദ്ധതികൾ ആവിഷ്കരിച്ചിട്ടുണ്ട്. 75 വയസ്സിന് മുകളിലുള്ളവർക്കുള്ള ഓൾഡ് ഏജ് സെക്യൂരിറ്റി വർദ്ധിപ്പിക്കൽ, ഗ്യാരന്റീഡ് ഇൻകം സപ്ലിമെന്റ് ഇളവുകൾ, കനേഡിയൻ ഡെന്റൽ കെയർ പ്ലാൻ, കുറഞ്ഞ നിരക്കിലുള്ള ഇന്റർനെറ്റ് സേവനം എന്നിവ ഇതിൽ ഉൾപ്പെടുന്നു. കൂടാതെ, പുതിയ ‘കാനഡ ഗ്രോസറീസ് ആൻഡ് എസൻഷ്യൽസ് ബെനിഫിറ്റ്’ വഴി കുറഞ്ഞ വരുമാനമുള്ള മുതിർന്ന പൗരന്മാരുടെ കുടുംബങ്ങൾക്ക് നിത്യോപയോഗ സാധനങ്ങൾ വാങ്ങാനുള്ള സഹായവും ലഭിക്കും. “കഴിഞ്ഞ 20 വർഷത്തിലേറെയായി ഈ പദ്ധതിയിലൂടെ കാനഡയിലെ വിവിധ കമ്മ്യൂണിറ്റികളിൽ ഗവൺമെന്റ് നിക്ഷേപം നടത്തുന്നുണ്ടെന്നും, ഓരോ വർഷവും 400 കമ്മ്യൂണിറ്റികളിലായി 9 ലക്ഷത്തിലധികം മുതിർന്ന പൗരന്മാർ ഇതിന്റെ ഭാഗമാകുന്നുണ്ടെന്നും” സെക്രട്ടറി സ്റ്റെഫാനി മക്ലീൻ വ്യക്തമാക്കി.
അടുത്ത ഏതാനും ദശകങ്ങൾക്കുള്ളിൽ കാനഡയിലെ ജനസംഖ്യയുടെ 25 ശതമാനത്തോളം മുതിർന്ന പൗരന്മാരായിരിക്കുമെന്നും, 15 വർഷത്തിനുള്ളിൽ ഈ പ്രായപരിധിയിലുള്ളവരുടെ എണ്ണം 1.1 കോടിയിൽ എത്തിയേക്കാമെന്നുമാണ് കണക്കാക്കപ്പെടുന്നത്. ഈ സാഹചര്യത്തിൽ മുതിർന്ന പൗരന്മാരുടെ ക്ഷേമം മുൻനിർത്തി പ്രവർത്തിക്കുന്ന സംഘടനകൾക്ക് 52 ആഴ്ച വരെയുള്ള പ്രോജക്ടുകൾക്കായി ഈ വർഷം 50,000 ഡോളർ വരെ ഗ്രാന്റ് ലഭിക്കുന്നതാണ്. എന്നാൽ ഇങ്ങനെ സമർപ്പിക്കുന്ന പ്രോജക്റ്റുകളുടെ ആസൂത്രണത്തിലും നടത്തിപ്പിലും മുതിർന്ന പൗരന്മാർക്ക് പ്രധാന പങ്കുണ്ടായിരിക്കണം എന്ന് നിഷ്കർഷിച്ചിട്ടുണ്ട്. 2004-ൽ ആരംഭിച്ചതുമുതൽ ഈ പദ്ധതിയിലൂടെ കാനഡയിലുടനീളം 45,000-ത്തിലധികം പ്രോജക്ടുകൾക്ക് ഫണ്ട് നൽകിയിട്ടുള്ള ഗവൺമെന്റിന്റെ ആകെ നിക്ഷേപം ഇപ്പോൾ 100 കോടി ഡോളർ കടന്നിരിക്കുകയാണ്. ഈ സാമ്പത്തിക സഹായത്തിനായി അപേക്ഷിക്കാൻ താൽപ്പര്യമുള്ള സംഘടനകൾക്ക് ജി.സി.ഒ.എസ് (GCOS) പോർട്ടൽ വഴി അപേക്ഷകൾ സമർപ്പിക്കാം. ഈ പോർട്ടലിലൂടെ അപേക്ഷയുടെ നില പരിശോധിക്കാനും, രേഖകൾ ഓൺലൈനായി സമർപ്പിക്കാനും, ഫണ്ട് ലഭിച്ചാൽ അത് സുരക്ഷിതമായി കൈകാര്യം ചെയ്യാനും സാധിക്കും. കൂടുതൽ വിവരങ്ങൾക്കും അപേക്ഷ തയ്യാറാക്കുന്നതിനും സംഘടനകൾക്ക് തങ്ങളുടെ അടുത്തുള്ള എൻ.എച്ച്.എസ്.പി (NHSP) ഓഫീസുമായി ബന്ധപ്പെടാവുന്നതാണ്.
