പത്ത് വർഷത്തിനുള്ളിൽ പ്രവിശ്യയിലെ പ്രതിരോധ വ്യവസായ മേഖലയെ വികസിപ്പിക്കുന്നതിനും കൂടുതൽ നിക്ഷേപങ്ങൾ ആകർഷിക്കുന്നതിനുമുള്ള തന്ത്രപ്രധാനമായ പദ്ധതി പ്രഖ്യാപിച്ച് ഒൻ്റാരിയോ പ്രീമിയർ ഡഗ് ഫോർഡ്. ഓട്ടവയിൽ നടക്കുന്ന രാജ്യാന്തര പ്രതിരോധ പ്രദർശനമായ ‘കാൻസെക്’ (CANSEC)-ൽ പങ്കെടുക്കുകയായിരുന്നു അദ്ദേഹം. പുതിയ വികസന പദ്ധതിയിലൂടെ ഒൻ്റാരിയോയിൽ 43,000 പുതിയ തൊഴിലവസരങ്ങൾ സൃഷ്ടിക്കപ്പെടുമെന്നും, 2035-ഓടെ പ്രവിശ്യയുടെ സമ്പദ്വ്യവസ്ഥയ്ക്ക് 6 ബില്യൺ ഡോളർ ലഭിക്കുമെന്നും ഡഗ് ഫോർഡ് വ്യക്തമാക്കി. കൂടാതെ, പ്രവിശ്യാ സർക്കാരിലേക്ക് പ്രതിവർഷം 400 മില്യൺ ഡോളറിന്റെ നികുതി വരുമാനവും ലഭിക്കുമെന്നും പ്രതീക്ഷിക്കുന്നു.
നാറ്റോ അംഗരാജ്യങ്ങളുടെയും മറ്റ് സഖ്യകക്ഷികളുടെയും പ്രതിരോധ പദ്ധതികൾക്ക് സാമ്പത്തിക സഹായം നൽകുന്നതിനായി പുതുതായി രൂപീകരിക്കുന്ന ‘ഡിഫൻസ്, സെക്യൂരിറ്റി ആൻഡ് റീസിലിയൻസ് ബാങ്ക്’ ആതിഥേയത്വം വഹിക്കാൻ കാനഡയെ തിരഞ്ഞെടുത്തിട്ടുണ്ട്. എന്നാൽ ഈ അന്താരാഷ്ട്ര ബാങ്കിന്റെ ആസ്ഥാനം ഏത് നഗരത്തിലായിരിക്കണം എന്ന് ഫെഡറൽ സർക്കാർ ഇതുവരെ തീരുമാനിച്ചിട്ടില്ല. ടൊറൻ്റോ, മോൺട്രിയൽ, ഓട്ടവ, വൻകൂവർ എന്നീ പ്രമുഖ നഗരങ്ങളാണ് ഈ ബാങ്കിന്റെ ആസ്ഥാനത്തിനായി മത്സരരംഗത്തുള്ളത്.
