ഡാലസ് : 36-ാമത് ജിമ്മി ജോര്ജ് മെമ്മോറിയല് സൂപ്പര് ട്രോഫി വോളിബോള് ടൂര്ണമെന്റിലെ 40+ മാസ്റ്റേഴ്സ് വിഭാഗത്തില് കാലിഫോര്ണിയ ബ്ലാസ്റ്റേഴ്സ് കിരീടം ചൂടി. പരിചയസമ്പന്നതയും പോരാട്ടവീര്യവും മാറ്റുരച്ച
ഫൈനല് മത്സരത്തില് ശക്തരായ ഹ്യൂസ്റ്റൺ ചലഞ്ചേഴ്സിനെ പരാജയപ്പെടുത്തിയാണ് കാലിഫോര്ണിയ ചാമ്പ്യന്മാരായത്.
ഡാലസ്, ഫിലാഡല്ഫിയ, ഹ്യൂസ്റ്റൺ, കാലിഫോര്ണിയ എന്നീ നാല് പ്രമുഖ ടീമുകളാണ് മാസ്റ്റേഴ്സ് വിഭാഗത്തില് ഇത്തവണ മാറ്റുരച്ചത്. ലീഗ് മത്സരങ്ങളിലെ വാശിയേറിയ പോരാട്ടങ്ങള്ക്കൊടുവിലാണ് കാലിഫോര്ണിയയും ഹ്യൂസ്റ്റണും ഫൈനലിലേക്ക് യോഗ്യത നേടിയത്. ഫൈനലിലും ഉടനീളമുള്ള മത്സരങ്ങളിലും കാലിഫോര്ണിയ ബ്ലാസ്റ്റേഴ്സിനായി മാന്ത്രിക പ്രകടനം പുറത്തെടുത്ത വില്സണ് മാത്യു ടൂര്ണമെന്റിലെ ‘മോസ്റ്റ് വാല്യുബിള് പ്ലെയര്’ പുരസ്കാരത്തിന് അര്ഹനായി. കാലിഫോര്ണിയയുടെ പ്രതിരോധ കോട്ട കാത്ത ഉണ്ണികൃഷ്ണന് ‘ബെസ്റ്റ് ഡിഫന്സീവ് പ്ലെയര്’ പുരസ്കാരവും സ്വന്തമാക്കി. ഹ്യൂസ്റ്റണായി മികച്ച സ്മാഷുകളിലൂടെ കളം നിറഞ്ഞ ജറീഷ് ജോസ് ടൂര്ണമെന്റിലെ ‘ബെസ്റ്റ് ഒഫന്സീവ് പ്ലെയര്’ പുരസ്കാരം സ്വന്തമാക്കി.
