രാജ്യത്തെ ആഭ്യന്തര ടൂറിസം മേഖലയ്ക്ക് വലിയ ഉണർവ് നൽകുക എന്ന ലക്ഷ്യത്തോടെ ഫെഡറൽ സർക്കാർ ‘കാനഡ സ്ട്രോങ്ങ് പാസ്’ ഈ വേനൽക്കാലത്ത് തിരികെ കൊണ്ടുവരുന്നു. യാത്രകൾ, ക്യാമ്പിംഗ്, മ്യൂസിയം സന്ദർശനങ്ങൾ എന്നിവയ്ക്ക് വൻ ഇളവുകളാണ് ഈ പാസ് വഴി ലഭിക്കുക. 2026 ജൂൺ 19 മുതൽ സെപ്റ്റംബർ 7 വരെയാണ് ഈ പദ്ധതിയുടെ കാലാവധി. കാനഡയിലെയും വിദേശങ്ങളിൽ നിന്നുമുള്ള വിനോദസഞ്ചാരികൾക്ക് ഈ പാസ് ലഭ്യമാകും.

‘പാർക്സ് കാനഡ’യ്ക്ക് (Parks Canada) കീഴിലുള്ള എല്ലാ ചരിത്ര-സാംസ്കാരിക കേന്ദ്രങ്ങളിലേക്കും ദേശീയ പാർക്കുകളിലേക്കും പ്രവേശനം പൂർണ്ണമായും സൗജന്യമായിരിക്കും. കൂടാതെ ഔട്ട്ഡോർ ക്യാമ്പിംഗ് ഫീസിൽ 25 ശതമാനം ഇളവ് ലഭിക്കും. മാതാപിതാക്കൾക്കൊപ്പം യാത്ര ചെയ്യുന്ന 18 വയസ്സിന് താഴെയുള്ള കുട്ടികൾക്ക് ‘വിയാ റെയിൽ’ (Via Rail) യാത്ര തികച്ചും സൗജന്യമായിരിക്കും. 18 മുതൽ 24 വയസ്സുവരെയുള്ള യുവാക്കൾക്ക് ടിക്കറ്റ് നിരക്കിൽ 25 ശതമാനം ഇളവും ലഭിക്കും.

ദേശീയ-പ്രദേശിക മ്യൂസിയങ്ങളിലും ആർട്ട് ഗാലറികളിലും 18 വയസ്സിന് താഴെയുള്ള കുട്ടികൾക്ക് പ്രവേശനം സൗജന്യമായിരിക്കും. 18 മുതൽ 24 വയസ്സുവരെയുള്ളവർക്ക് പകുതി ടിക്കറ്റ് നിരക്ക് നൽകിയാൽ മതിയാകും. കഴിഞ്ഞ വർഷം ആദ്യമായി നടപ്പിലാക്കിയ ഈ പദ്ധതി വൻ വിജയമായിരുന്നു. മുൻവർഷങ്ങളെ അപേക്ഷിച്ച് വിയാ റെയിൽ യാത്രക്കാരുടെ എണ്ണത്തിൽ 6.5 ശതമാനവും, മ്യൂസിയം സന്ദർശകരിൽ 15 ശതമാനവും വർദ്ധനവുണ്ടായി. കഴിഞ്ഞ ജൂൺ-സെപ്റ്റംബർ മാസങ്ങളിൽ മാത്രം 1.45 കോടി ആളുകളാണ് പാർക്സ് കാനഡ കേന്ദ്രങ്ങൾ സന്ദർശിച്ചത്.

കോവിഡ് പ്രതിസന്ധികൾക്ക് ശേഷം രാജ്യത്തെ ടൂറിസം ബിസിനസ്സുകളെ പിന്തുണയ്ക്കുന്നതിനൊപ്പം കാനഡക്കാർക്ക് കുറഞ്ഞ ചെലവിൽ സ്വന്തം രാജ്യം ചുറ്റിക്കാണാൻ അവസരമൊരുക്കുക എന്നിവയാണ് സർക്കാർ ഇതിലൂടെ ലക്ഷ്യമിടുന്നത്. വിദേശയാത്രകൾക്ക് പകരം സ്വന്തം രാജ്യത്തെ പ്രകൃതിഭംഗിയും സാംസ്കാരിക പൈതൃകവും ആസ്വദിക്കാൻ ഈ പദ്ധതി കൂടുതൽ കുടുംബങ്ങളെയും യുവാക്കളെയും പ്രേരിപ്പിക്കുമെന്നാണ് അധികൃതരുടെ പ്രതീക്ഷ. 2026-ലും കാനഡയിലെ ടൂറിസം രംഗത്ത് വലിയ മുന്നേറ്റമുണ്ടാക്കാൻ ഈ പാസ് സഹായിക്കുമെന്ന് ‘ഡെസ്റ്റിനേഷൻ കാനഡ’ വിലയിരുത്തുന്നു.