ഷിക്കാഗോ: യു.എസിലെ ഷിക്കാഗോയിലുണ്ടായ ദാരുണമായ വാഹനാപകടത്തിൽ ഇന്ത്യൻ വിദ്യാർഥിനി മരിച്ചു. തെലങ്കാനയിലെ നൽഗൊണ്ട ജില്ലയിൽ നിന്നുള്ള 25 കാരിയായ നവ്യ ഗഡുസുവാണ് മരിച്ചത്. അപകടത്തിൽ വാനിലുണ്ടായിരുന്ന മറ്റ് ആറുപേർക്ക് പരുക്കേൽക്കുകയും ചെയ്തു. വിദ്യാർഥിനിയുടെ അപ്രതീക്ഷിത വിയോഗത്തിൽ ഷിക്കാഗോയിലെ ഇന്ത്യൻ കോൺസുലേറ്റ് ജനറൽ അനുശോചനം രേഖപ്പെടുത്തി.
ഇന്ത്യാനയിലെ ലേക്ക് കൗണ്ടിയിലുള്ള ക്രൗൺ പോയിന്റിന് സമീപം ഇന്റർസ്റ്റേറ്റ് 65-ൽ ശനിയാഴ്ച രാത്രിയായിരുന്നു അപകടം നടന്നത്. ഏഴുപേരുമായി സഞ്ചരിച്ചിരുന്ന മിനിവാനാണ് അപകടത്തിൽപ്പെട്ടത്. മറ്റൊരു വാഹനത്തിന് പുറകിലായി കുറഞ്ഞ വേഗതയിൽ സഞ്ചരിക്കുന്നതിനിടെ ഇവരുടെ വാൻ കാറിലിടിക്കുകയായിരുന്നു. ഇടിയുടെ ആഘാതത്തിൽ നിയന്ത്രണം വിട്ട മിനിവാൻ റോഡിൽ മറിഞ്ഞാണ് ദുരന്തമുണ്ടായത്.
അപകടത്തിൽപ്പെട്ട മിനിവാനിൽ രണ്ട് മുൻ സീറ്റുകൾ മാത്രമേ ഉണ്ടായിരുന്നുള്ളൂവെന്നും മരിച്ച നവ്യ ഉൾപ്പെടെയുള്ള മറ്റ് യാത്രക്കാർ സീറ്റുകളില്ലാത്ത വാനിന്റെ പുറകിലത്തെ ഭാഗത്താണ് ഇരുന്നിരുന്നതെന്നും അന്വേഷണ ഉദ്യോഗസ്ഥർ വ്യക്തമാക്കി. പരുക്കേറ്റവരെ സമീപത്തെ ആശുപത്രികളിൽ പ്രവേശിപ്പിച്ചിരിക്കുകയാണ്. മൃതദേഹം നാട്ടിലെത്തിക്കാനുള്ള നടപടികൾക്കായി കോൺസുലേറ്റ് അധികൃതർ കുടുംബവുമായി ബന്ധപ്പെടുന്നുണ്ട്.
