അമരാവതി: ആന്ധ്രാപ്രദേശിൽ കുറഞ്ഞുവരുന്ന ജനനനിരക്ക് വർധിപ്പിക്കുന്നതിനായി പുതിയ പ്രഖ്യാപനങ്ങളുമായി മുഖ്യമന്ത്രി എൻ. ചന്ദ്രബാബു നായിഡു. കുടുംബത്തിൽ മൂന്നാമതുണ്ടാകുന്ന കുട്ടിക്ക് 30,000 രൂപയും നാലാമത്തെ കുട്ടിക്ക് 40,000 രൂപയും ധനസഹായം നൽകുമെന്ന് അദ്ദേഹം പ്രഖ്യാപിച്ചു. മുൻപ് ജനസംഖ്യാ നിയന്ത്രണത്തെ അനുകൂലിച്ചിരുന്ന ആളായിരുന്നു താനെങ്കിലും, ജനനനിരക്ക് കൂട്ടാൻ സമൂഹം ഒന്നിച്ച് പ്രവർത്തിക്കേണ്ട സമയം അതിക്രമിച്ചിരിക്കുകയാണെന്ന് മുഖ്യമന്ത്രി പറഞ്ഞു.
ശ്രീകാകുളം ജില്ലയിലെ നരസന്നപേട്ടയിൽ നടന്ന ‘സ്വർണ്ണ ആന്ധ്ര, സ്വച്ഛ് ആന്ധ്ര’ ശുചീകരണ പരിപാടിയുടെ ഭാഗമായി നടന്ന പൊതുസമ്മേളനത്തിൽ സംസാരിക്കുകയായിരുന്നു അദ്ദേഹം. ഇതുസംബന്ധിച്ച കൂടുതൽ വിവരങ്ങൾ ഒരു മാസത്തിനകം സർക്കാർ പുറത്തുവിടുമെന്നും നായിഡു വ്യക്തമാക്കി. രണ്ടാമത്തെ കുട്ടി ജനിക്കുന്ന കുടുംബങ്ങൾക്ക് 25,000 രൂപ ധനസഹായം നൽകുന്നത് പരിഗണിക്കുമെന്ന് കഴിഞ്ഞ മാർച്ച് 5-ന് അദ്ദേഹം നിയമസഭയിൽ അറിയിച്ചിരുന്നു. എന്നാൽ മൂന്നാമത്തെയും അതിനുശേഷമുള്ളതുമായ കുട്ടികൾക്ക് ആനുകൂല്യം നീട്ടാൻ സർക്കാർ തീരുമാനിച്ചതായി ആരോഗ്യ മന്ത്രി സത്യകുമാർ യാദവ് പിന്നീട് വ്യക്തമാക്കി.
വർദ്ധിച്ചുവരുന്ന വരുമാനത്തിനനുസരിച്ച് ചില ദമ്പതികൾ ഒരു കുട്ടിയെ മാത്രം മതിയെന്ന് വെക്കുകയാണെന്നും, എന്നാൽ മറ്റുചിലർ ആദ്യത്തെ കുട്ടി ആൺകുട്ടിയല്ലെങ്കിൽ മാത്രമേ രണ്ടാമതൊരു കുട്ടിക്ക് മുതിരുന്നുള്ളൂ എന്നും ചന്ദ്രബാബു നായിഡു നിരീക്ഷിച്ചു. ഇതിന്റെ ഫലമായി സംസ്ഥാനത്തെ ജനസംഖ്യാ വളർച്ചാ നിരക്ക് കുറയുകയാണെന്നും റീപ്ലേസ്‌മെന്റ് ലെവൽ ടോട്ടൽ ഫെർട്ടിലിറ്റി റേറ്റ് (Replacement-level Total Fertility Rate) നിലനിർത്തേണ്ടത് പ്രധാനമാണെന്നും അദ്ദേഹം മുന്നറിയിപ്പ് നൽകി. ഒരു സ്ത്രീക്ക് ശരാശരി 2.1 കുട്ടികൾ എന്ന നിരക്കിൽ ജനനനിരക്ക് ഉണ്ടായാൽ മാത്രമേ ജനസംഖ്യ സ്ഥിരതയോടെ നിലനിൽക്കൂ എന്ന് അദ്ദേഹം ചൂണ്ടിക്കാട്ടി. പല രാജ്യങ്ങളിലെയും കുറഞ്ഞ ജനസംഖ്യയും പ്രായമേറിയവരുടെ എണ്ണക്കൂടുതലും അവിടുത്തെ സമ്പദ്‌വ്യവസ്ഥയെ ദോഷകരമായി ബാധിച്ചിട്ടുണ്ടെന്നും അദ്ദേഹം പറഞ്ഞു.
ആന്ധ്രയിലെ ജനസംഖ്യാ വളർച്ചാ നയത്തെക്കുറിച്ച് ടിഡിപി നേതാവും എൻഡിഎ സഖ്യകക്ഷിയുമായ ചന്ദ്രബാബു നായിഡു സംസാരിക്കുന്നത് ഇതാദ്യമല്ല. ദക്ഷിണേന്ത്യയിലെ കുറഞ്ഞ ജനനനിരക്ക് പാർലമെന്റിലെ പ്രാതിനിധ്യത്തെ ബാധിക്കുമെന്ന ആശങ്ക പ്രകടിപ്പിച്ചുകൊണ്ട്, കൂടുതൽ കുട്ടികളുണ്ടാകാൻ ജനങ്ങളെ പ്രോത്സാഹിപ്പിക്കുന്ന നയം സർക്കാർ ഉടൻ കൊണ്ടുവരുമെന്ന് കഴിഞ്ഞ വർഷം ജൂലൈയിൽ അദ്ദേഹം പറഞ്ഞിരുന്നു. ജനസംഖ്യയാണ് തങ്ങളുടെ ഏറ്റവും വലിയ സാമ്പത്തിക വിഭവമെന്നും, ലോകം വലിയ ജനസംഖ്യയുള്ള രാജ്യങ്ങളെയാണ് കൂടുതൽ ആശ്രയിക്കുന്നതെന്നും അദ്ദേഹം അന്ന് കൂട്ടിച്ചേർത്തു. കൂടാതെ, ആന്ധ്രയിലെ ജനസംഖ്യയിൽ പ്രായമേറിയവരുടെ എണ്ണം കൂടുന്നതിന്റെ പ്രത്യാഘാതങ്ങളെക്കുറിച്ച് 2024 ഒക്ടോബറിലും അദ്ദേഹം മുന്നറിയിപ്പ് നൽകിയിരുന്നു.
