കാനഡയിൽ സ്ഥിരതാമസത്തിന് അവസരം തേടുന്നവർക്ക് ആശ്വാസമേകി IRCC പുതിയ എക്സ്പ്രസ് എൻട്രി നറുക്കെടുപ്പ് ഫലം പുറത്തുവിട്ടു. കനേഡിയൻ എക്സ്പീരിയൻസ് ക്ലാസ് (CEC) വിഭാഗത്തിൽപ്പെട്ട 4,000 അപേക്ഷകർക്കാണ് ഇത്തവണ അപേക്ഷിക്കാൻ (ITA) ക്ഷണം ലഭിച്ചത്. 2026-ൽ നടക്കുന്ന പതിനാറാമത് എക്സ്പ്രസ് എൻട്രി നറുക്കെടുപ്പാണിത്.
ഇത്തവണത്തെ നറുക്കെടുപ്പിൽ പരിഗണിക്കപ്പെടുന്നതിനായി അപേക്ഷകർക്ക് CRS സ്കോർ കുറഞ്ഞത് 507 പോയിന്റാണ് വേണ്ടത്. ഈ വർഷം നടക്കുന്ന അഞ്ചാമത്തെ സിഇസി നറുക്കെടുപ്പാണിത്. നിലവിൽ രാജ്യത്തിനകത്ത് ജോലി ചെയ്യുന്നവർക്കും മുൻപ് കനേഡിയൻ പ്രവൃത്തിപരിചയം ഉള്ളവർക്കും മുൻഗണന നൽകുന്ന രീതിയിലാണ് ഈ നറുക്കെടുപ്പ് ക്രമീകരിച്ചിരിക്കുന്നത്. കാനഡയുടെ നിലവിലെ തൊഴിൽ വിപണിയിലെ ആവശ്യങ്ങൾ കൂടി പരിഗണിച്ചാണ് വിവിധ വിഭാഗങ്ങളിലായി നറുക്കെടുപ്പുകൾ നടക്കുന്നത്. സിഇസിക്ക് പിന്നാലെ ഫ്രഞ്ച് ഭാഷാ പ്രാവീണ്യമുള്ളവർക്കാണ് (14,000 പേർ) ഈ വർഷം കൂടുതൽ അവസരം ലഭിച്ചത്. ഹെൽത്ത് കെയർ ആൻഡ് സോഷ്യൽ സർവീസ് വിഭാഗത്തിൽ 4,000 പേർക്കും പ്രൊവിൻഷ്യൽ നോമിനി പ്രോഗ്രാം (PNP) വഴി 2,583 പേർക്കും ക്ഷണം ലഭിച്ചു. കൂടാതെ ഡോക്ടർമാർക്കും സീനിയർ മാനേജർമാർക്കുമായി പ്രത്യേക നറുക്കെടുപ്പുകളും ഈ വർഷം നടന്നിട്ടുണ്ട്. വരും മാസങ്ങളിലും കൂടുതൽ നറുക്കെടുപ്പുകൾ ഉണ്ടാകുമെന്നാണ് ഇമിഗ്രേഷൻ മേഖലയിലെ വിദഗ്ധർ നൽകുന്ന സൂചന.
