എഡ്മന്റൺ: കാനഡയിലെ ആൽബർട്ടയിൽ നിയമസഹായം തേടുന്നവർക്ക് ആശ്വാസമായി ‘ഡേവിഡ്’ എന്ന എഐ (AI) അഭിഭാഷകൻ എത്തുന്നു. ആൽബർട്ട ആസ്ഥാനമായി പ്രവർത്തിക്കുന്ന ‘പെയ്‌ൻവർത്ത്’ (Painworth) എന്ന ലീഗൽ ടെക്നോളജി കമ്പനിയാണ് അപകടങ്ങളിൽ പരിക്കേൽക്കുന്നവർക്ക് നഷ്ടപരിഹാര ക്ലെയിമുകൾ ഫയൽ ചെയ്യാൻ സഹായിക്കുന്ന ഈ നൂതന സംവിധാനം അവതരിപ്പിച്ചത്.

സാധാരണക്കാർക്ക് താങ്ങാനാവുന്ന ചെലവിൽ നിയമസഹായം ലഭ്യമാക്കുക എന്ന ലക്ഷ്യത്തോടെ 2020-ലാണ് ഈ കമ്പനി പ്രവർത്തനം ആരംഭിച്ചത്. വക്കീൽ ഫീസ് നൽകാൻ പ്രയാസപ്പെടുന്നവർക്കും, വിദൂര ഗ്രാമപ്രദേശങ്ങളിൽ താമസിക്കുന്നവർക്കും ഈ സേവനം ഏറെ ഗുണകരമാകും. ഒരു ലോ ഫേം ആയി പ്രവർത്തിക്കാൻ ആൽബർട്ട ലോ സൊസൈറ്റി ഇവർക്ക് അനുമതി നൽകിയിട്ടുണ്ട്. എങ്കിലും, എല്ലാ ഫയലുകളും കൃത്യമായ മേൽനോട്ടത്തിനായി ഒരു മനുഷ്യ അഭിഭാഷകൻ പരിശോധിക്കണമെന്ന കർശന വ്യവസ്ഥയോടെയാണ് ഈ പ്രവർത്തനാനുമതി.

വിവിധ ഭാഷകളിൽ ആശയവിനിമയം നടത്താൻ കഴിയുന്ന ‘ഡേവിഡ്’ എന്ന എഐ സിസ്റ്റം 24 മണിക്കൂറും സേവനത്തിന് ലഭ്യമാണ്. മെഡിക്കൽ രേഖകൾ പരിശോധിച്ച് റിപ്പോർട്ടുകൾ തയ്യാറാക്കുന്നതും നിയമപരമായ രേഖകൾ ഡ്രാഫ്റ്റ് ചെയ്യുന്നതും ഈ സംവിധാനത്തിലൂടെയാണ്. പരമ്പരാഗത രീതിയിൽ ഇത്തരം കേസുകൾക്കായി അഭിഭാഷകർ 33 ശതമാനം വരെ കമ്മീഷൻ ഈടാക്കുമ്പോൾ, പെയ്‌ൻവർത്ത് വെറും 28 ശതമാനം മാത്രമാണ് ഈടാക്കുന്നത് എന്നത് ശ്രദ്ധേയമാണ്.

2019-ൽ തനിക്കുണ്ടായ ഒരു അപകടത്തെത്തുടർന്നുണ്ടായ നിയമപോരാട്ടത്തിലെ അനുഭവങ്ങൾ മുൻനിർത്തി മൈക്ക് സൂഹ്രി എന്ന വ്യക്തിയാണ് ഈ സ്റ്റാർട്ടപ്പിന് തുടക്കമിട്ടത്. നിലവിൽ ചില കേസുകൾ കോടതിയുടെ പരിഗണനയിലാണെന്നും, സാധാരണ നിയമനടപടികളേക്കാൾ വേഗത്തിലും കുറഞ്ഞ ചെലവിലും നീതി ലഭ്യമാക്കുകയാണ് തങ്ങളുടെ ലക്ഷ്യമെന്നും കമ്പനി അധികൃതർ വ്യക്തമാക്കി.