വിനിപെഗ്: കാനഡയിലെ വിനിപെഗിലുള്ള ആശുപത്രികളുടെ എമർജൻസി വാർഡുകളിൽ എത്തുന്ന രോഗികൾക്ക് ചികിത്സ ലഭിക്കാതെ മടങ്ങേണ്ടി വരുന്ന സാഹചര്യം അതിരൂക്ഷമാകുന്നു. മാനിറ്റോബയിലെ ആരോഗ്യ സംവിധാനങ്ങളുടെ മേൽനോട്ടം വഹിക്കുന്ന ‘ഷെയേർഡ് ഹെൽത്ത്’ പുറത്തുവിട്ട ഏറ്റവും പുതിയ കണക്കുകൾ പ്രകാരം, എമർജൻസി വാർഡുകളിൽ എത്തുന്ന നാലിൽ ഒരാൾ വീതം ചികിത്സ ലഭിക്കാതെ തിരിച്ചുപോകുന്നു എന്നാണ് കണ്ടെത്തൽ.
കഴിഞ്ഞ അഞ്ച് വർഷത്തിനിടെ ഈ നിരക്കിൽ ഇരട്ടിയിലധികം വർദ്ധനവാണ് രേഖപ്പെടുത്തിയിരിക്കുന്നത്. 2020-ൽ ചികിത്സ കിട്ടാതെ മടങ്ങുന്നവരുടെ എണ്ണം 11 ശതമാനമായിരുന്നുവെങ്കിൽ, 2025-26 കാലഘട്ടത്തിൽ ഇത് 25 ശതമാനത്തിലധികമായി ഉയർന്നു. വിനിപെഗിലെ പല ആശുപത്രികളിലും നിലവിൽ രോഗികൾക്ക് 10 മണിക്കൂർ വരെ എമർജൻസി വാർഡുകളിൽ കാത്തിരിക്കേണ്ടി വരുന്നുണ്ട്. രോഗികളുടെ എണ്ണത്തിലുണ്ടായ അമിതമായ വർദ്ധനവും ആരോഗ്യപ്രവർത്തകരുടെ കുറവുമാണ് ഈ പ്രതിസന്ധിക്ക് കാരണമായി അധികൃതർ വിലയിരുത്തുന്നത്.
അടുത്തിടെ സെന്റ് ബോണിഫേസ് ആശുപത്രിയിൽ ചികിത്സയ്ക്കായി 11 മണിക്കൂർ കാത്തിരുന്ന 55 വയസ്സുകാരി മരണപ്പെട്ട സംഭവം വലിയ പ്രതിഷേധങ്ങൾക്ക് ഇടയാക്കിയിരുന്നു. മതിയായ സമയത്ത് ചികിത്സ ലഭിക്കാത്തതാണ് മരണത്തിന് കാരണമായതെന്ന് കുടുംബം ആരോപിച്ചു. കാനഡയിലെ വിവിധ പ്രവിശ്യകളിൽ സമാനമായ റിപ്പോർട്ടുകൾ പുറത്തുവരുന്നത് ദേശീയ തലത്തിൽ തന്നെ വലിയ ചർച്ചകൾക്ക് തുടക്കമിട്ടിട്ടുണ്ട്.
നിലവിലെ സാഹചര്യം അംഗീകരിക്കാനാവില്ലെന്ന് ‘ഷെയേർഡ് ഹെൽത്ത്’ വ്യക്തമാക്കി. കാത്തിരിപ്പ് സമയം കുറയ്ക്കുന്നതിനും രോഗികൾക്ക് വേഗത്തിൽ ചികിത്സ ഉറപ്പാക്കുന്നതിനുമായി കൂടുതൽ ജീവനക്കാരെ നിയമിക്കാനും ബെഡുകളുടെ എണ്ണം വർദ്ധിപ്പിക്കാനും നടപടികൾ ആരംഭിച്ചിട്ടുണ്ട്. ഇതിനുപുറമെ, കമ്മ്യൂണിറ്റി ക്ലിനിക്കുകളും വെർച്വൽ കെയർ സംവിധാനങ്ങളും ശക്തിപ്പെടുത്തി എമർജൻസി വാർഡുകളിലെ തിരക്ക് കുറയ്ക്കാനാണ് അധികൃതർ ഇപ്പോൾ ലക്ഷ്യമിടുന്നത്.
