കാനഡയുടെ വ്യാപാരബന്ധങ്ങൾ ശക്തമാക്കുന്നതിനായി വിപുലമായ വിദേശപര്യടനങ്ങൾക്ക് ഒരുങ്ങി പ്രധാനമന്ത്രി മാർക്ക് കാർണി. അടുത്ത പത്ത് വർഷത്തിനുള്ളിൽ അമേരിക്ക ഒഴികെയുള്ള രാജ്യങ്ങളിലേക്കുള്ള കാനഡയുടെ കയറ്റുമതി ഇരട്ടിയാക്കുക എന്ന ലക്ഷ്യമാണ് അദ്ദേഹം മുന്നോട്ടുവെച്ചിരിക്കുന്നത്. രാജ്യത്തിൻ്റെ ദീർഘകാല അഭിവൃദ്ധിക്ക് ആഗോളതലത്തിൽ വ്യാപാരം വ്യാപിപ്പിക്കേണ്ടത് അത്യാവശ്യമാണെന്ന നിലപാടിലാണ് മാർക്ക് കാർണി.
പുതിയ പങ്കാളിത്തങ്ങൾ കെട്ടിപ്പടുക്കുന്നത് കാനഡയുടെ സമ്പദ്വ്യവസ്ഥയെ വളർത്താനും യുഎസ് വിപണിയോടുള്ള അമിത ആശ്രിതത്വം കുറയ്ക്കാനും സഹായിക്കുമെന്ന് കാർണി വിശ്വസിക്കുന്നു. ഇതിന്റെ ഭാഗമായി ജനുവരിയിൽ അദ്ദേഹം ഫ്രാൻസ്, ചൈന, ഖത്തർ, സ്വിറ്റ്സർലൻഡ് എന്നീ രാജ്യങ്ങൾ സന്ദർശിച്ചു. സ്വിറ്റ്സർലൻഡ് സന്ദർശനത്തിനിടെ ദാവോസിൽ നടന്ന ലോക സാമ്പത്തിക ഫോറത്തിലും അദ്ദേഹം പങ്കെടുത്തു.
കൂടുതൽ വ്യാപാര ചർച്ചകൾക്കായി ഫെബ്രുവരിയിൽ അദ്ദേഹം ഇന്ത്യ സന്ദർശിക്കുമെന്നാണ് ഔദ്യോഗിക വൃത്തങ്ങൾ നൽകുന്ന സൂചന. അന്താരാഷ്ട്ര നിക്ഷേപകരെ കാനഡയിലേക്ക് ആകർഷിക്കുന്നതിനൊപ്പം കനേഡിയൻ ബിസിനസുകൾക്ക് വിദേശത്ത് കൂടുതൽ അവസരങ്ങൾ തുറന്നുനൽകാനും അദ്ദേഹം ലക്ഷ്യമിടുന്നുണ്ട്.
കാനഡയെ ഒരു ആഗോള ശക്തിയാക്കി മാറ്റാനുള്ള ഈ നീക്കത്തെ ‘ധീരമായ ചുവടുവെപ്പ്’ എന്നാണ് നിരീക്ഷകർ വിലയിരുത്തുന്നത്. യൂറോപ്പ്, ഏഷ്യ, മിഡിൽ ഈസ്റ്റ് രാജ്യങ്ങളുമായി ശക്തമായ ബന്ധം സ്ഥാപിക്കാൻ കാനഡ ഗൗരവമായി ശ്രമിക്കുന്നുവെന്നതിൻ്റെ തെളിവാണ് ഈ യാത്രകളെന്നാണ് വിദഗ്ധർ പറയുന്നത്. എന്നാൽ, അമിതമായ വിദേശയാത്രകൾ ആഭ്യന്തര പ്രശ്നങ്ങളിൽ നിന്നുള്ള ശ്രദ്ധ തിരിക്കുമെന്ന് വിമർശകർ മുന്നറിയിപ്പ് നൽകുന്നുണ്ട്.
