കാനഡയിലെ പ്രധാന നിർമ്മാണ പദ്ധതികളിൽ ഖത്തർ വൻതോതിൽ നിക്ഷേപം നടത്തുമെന്ന് പ്രധാനമന്ത്രി മാർക്ക് കാർണി പ്രഖ്യാപിച്ചു. ഖത്തർ അമീർ ഷെയ്ഖ് തമീം ബിൻ ഹമദ് അൽ താനിയുമായി ദോഹയിൽ നടത്തിയ കൂടിക്കാഴ്ചയ്ക്ക് ശേഷമാണ് അദ്ദേഹം ഇക്കാര്യം അറിയിച്ചത്. ഇരുരാജ്യങ്ങളും തമ്മിലുള്ള ബന്ധത്തിൽ പുതിയൊരു അധ്യായമാണിതെന്നും അദ്ദേഹം വിശേഷിപ്പിച്ചു.
വർഷങ്ങളായി മുടങ്ങിക്കിടന്നിരുന്ന നിക്ഷേപ പ്രോത്സാഹന സംരക്ഷണ കരാറിന് ഇതോടെ അന്തിമരൂപമാകും. ഐടി, ആർട്ടിഫിഷ്യൽ ഇൻ്റലിജൻസ് (AI), ഊർജ്ജം, പ്രതിരോധം എന്നീ മേഖലകളിൽ സഹകരണം വർധിപ്പിക്കാനും പുതിയ തൊഴിലവസരങ്ങൾ സൃഷ്ടിക്കാനും ഈ തന്ത്രപ്രധാന നിക്ഷേപം സഹായിക്കുമെന്ന് കാർണി വ്യക്തമാക്കി. രണ്ടാം ഘട്ടമെന്ന നിലയിൽ, പ്രതിരോധ മേഖലയിൽ സഹകരണം ശക്തമാക്കാൻ കാനഡ ഒരു ഡിഫൻസ് അറ്റാഷെയെ ഖത്തറിൽ നിയമിക്കും. കൂടാതെ, ഇരുരാജ്യങ്ങൾക്കുമിടയിലുള്ള വ്യോമയാന സർവീസുകൾ വിപുലീകരിക്കാനും ധാരണയായിട്ടുണ്ട്.
നിലവിലെ ആഗോള സാമ്പത്തിക സാഹചര്യത്തിൽ അമേരിക്കയെ മാത്രം ആശ്രയിക്കാതെ വ്യാപാര ബന്ധങ്ങൾ വൈവിധ്യവത്കരിക്കാനാണ് കാനഡ ലക്ഷ്യമിടുന്നത്. ഈ വർഷം കാനഡയിൽ നടക്കുന്ന ലോകകപ്പ് മത്സരം കാണാൻ അമീറിനെ കാർണി ക്ഷണിച്ചിട്ടുണ്ട്. ചൈനയുമായുള്ള വ്യാപാര ചർച്ചകൾക്ക് പിന്നാലെ ഖത്തറുമായി കൈകോർക്കുന്നത് കാനഡയുടെ സാമ്പത്തിക സുരക്ഷയ്ക്കും വളർച്ചയ്ക്കും നിർണ്ണായകമാകുമെന്നാണ് വിലയിരുത്തപ്പെടുന്നത്.
