കോപ്പൻഹേഗൻ : ആർട്ടിക് മേഖലയിലെ തന്ത്രപ്രധാന ദ്വീപായ ഗ്രീൻലാൻഡിനെച്ചൊല്ലി അമേരിക്കയും ഡെന്മാർക്കും തമ്മിലുള്ള നയതന്ത്ര പോര് രൂക്ഷമാകുന്നു. ഗ്രീൻലാൻഡ് സ്വന്തമാക്കാനുള്ള യുഎസ് പ്രസിഡന്റ് ഡൊണാൾഡ് ട്രംപിന്റെ താൽപ്പര്യം ആഗോള സുരക്ഷാ ക്രമത്തെ വെല്ലുവിളിക്കുന്നതാണെന്ന് ഡാനിഷ് പ്രധാനമന്ത്രി മെറ്റെ ഫ്രെഡറിക്സൻ വ്യക്തമാക്കി. രാജ്യത്തിന്റെ പരമാധികാരം സംരക്ഷിക്കാൻ പ്രതിജ്ഞാബദ്ധമാണെന്നും സൈനിക ഭീഷണികൾക്ക് വഴങ്ങില്ലെന്നും പ്രഖ്യാപിച്ച ഡെന്മാർക്ക്, ഈ നീക്കം പാശ്ചാത്യ സുരക്ഷാ സഖ്യമായ നാറ്റോയുടെ നിലനിൽപ്പിനെത്തന്നെ ബാധിക്കുമെന്ന് മുന്നറിയിപ്പ് നൽകി. ദ്വീപിന്റെ ഭാവിയെച്ചൊല്ലിയുള്ള തർക്കം ഒരു നിർണ്ണായക ഘട്ടത്തിലാണെന്നും അന്താരാഷ്ട്ര നിയമങ്ങളെ മാനിക്കാൻ അമേരിക്ക തയ്യാറാകണമെന്നും അവർ ആവശ്യപ്പെട്ടു.
ഗ്രീൻലാൻഡ് ഡെന്മാർക്കിന് കീഴിലുള്ള സ്വയംഭരണ പ്രദേശമാണെന്നിരിക്കെ, അതിന്മേലുള്ള യുഎസ് അവകാശവാദങ്ങൾ അസ്ഥാനത്താണെന്ന് ഫ്രെഡറിക്സൻ പറഞ്ഞു. ഗ്രീൻലാൻഡ് വിൽക്കാനുള്ളതല്ലെന്നും അവിടുത്തെ ജനങ്ങളുടെ സ്വയം നിർണ്ണയാവകാശത്തെ ആദരിക്കണമെന്നുമാണ് കോപ്പൻഹേഗന്റെ ഔദ്യോഗിക നിലപാട്.
റഷ്യയുടെയും ചൈനയുടെയും ആർട്ടിക് മേഖലയിലെ സൈനിക സ്വാധീനം പ്രതിരോധിക്കാൻ ഗ്രീൻലാൻഡ് അത്യന്താപേക്ഷിതമാണെന്ന വാഷിംഗ്ടണിന്റെ വാദത്തെ യൂറോപ്യൻ രാജ്യങ്ങൾ ഒന്നടങ്കം തള്ളിക്കളഞ്ഞു. ജർമ്മനി, സ്വീഡൻ തുടങ്ങിയ രാജ്യങ്ങൾ ഡെന്മാർക്കിന് ഐക്യദാർഢ്യം പ്രഖ്യാപിച്ചതോടെ രണ്ടാം ലോകമഹായുദ്ധത്തിന് ശേഷം രൂപപ്പെട്ട ട്രാൻസ്-അറ്റ്ലാന്റിക് സഖ്യത്തിൽ മുൻപെങ്ങുമില്ലാത്ത വിധം വിള്ളലുകൾ പ്രത്യക്ഷപ്പെട്ടിരിക്കുകയാണ്.
ഗ്രീൻലാൻഡിലെ വൻതോതിലുള്ള ധാതുശേഖരവും മഞ്ഞുരുകുന്നതോടെ രൂപപ്പെടുന്ന പുതിയ കപ്പൽ പാതകളുമാണ് ലോകശക്തികളെ ഈ പ്രദേശത്തേക്ക് ആകർഷിക്കുന്നത്. സൈനിക ബലത്തിലൂടെ ലക്ഷ്യം കാണുമെന്ന ട്രംപിന്റെ നിലപാട് യൂറോപ്യൻ രാജ്യങ്ങൾക്കിടയിൽ കടുത്ത അതൃപ്തിക്ക് കാരണമായിട്ടുണ്ട്. വരും ദിവസങ്ങളിൽ വാഷിംഗ്ടണിൽ നടക്കാനിരിക്കുന്ന അന്താരാഷ്ട്ര ചർച്ചകളിൽ ഗ്രീൻലാൻഡ് വിഷയം പ്രധാന അജണ്ടയാകും. സുരക്ഷാ മുൻനിർത്തി ആർട്ടിക് മേഖലയിൽ നാറ്റോയുടെ നേതൃത്വത്തിൽ പ്രത്യേക നിരീക്ഷണ സംവിധാനം (Arctic Sentry) ഏർപ്പെടുത്തുന്നത് സംബന്ധിച്ചും ചർച്ചകൾ സജീവമാണ്.
