കാനഡയുടെ അടിയന്തര മുന്നറിയിപ്പ് സംവിധാനമായ ‘അലർട്ട് റെഡി’ (Alert Ready) ഇന്ന് രാജ്യത്തുടനീളം പരീക്ഷിക്കും. ടെലിവിഷൻ, റേഡിയോ, സ്മാർട്ട്‌ഫോണുകൾ പോലുള്ള വയർലെസ് ഉപകരണങ്ങളിൽ മുന്നറിയിപ്പ് സന്ദേശവും പ്രത്യേക ടോണും മുഴങ്ങും. ഇന്ന് ഉച്ചയ്ക്ക് മുൻപും ഉച്ചയ്ക്ക് ശേഷവുമുള്ള സമയങ്ങളിലായി ഓരോ പ്രവിശ്യയിലും ടെസ്റ്റ് സന്ദേശങ്ങൾ ദൃശ്യമാകും.

ടൊർണാഡോ, കാട്ടുതീ, ആംബർ അലർട്ടുകൾ (കുട്ടികളെ തട്ടിക്കൊണ്ടുപോകുമ്പോൾ നൽകുന്ന മുന്നറിയിപ്പ്) പോലുള്ള അടിയന്തിര സാഹചര്യങ്ങളിൽ സംവിധാനം പ്രവർത്തിക്കുന്നുണ്ടെന്ന് ഉറപ്പാക്കാനും ഉദ്യോഗസ്ഥർക്ക് പരിശീലനം നൽകാനുമാണ് സാധാരണയായി മെയ്, നവംബർ മാസങ്ങളിൽ ഈ പരിശോധന നടത്തുന്നത്. ഒക്ടോബർ 31 വരെ ഈ വർഷം ഏകദേശം 900 അടിയന്തര മുന്നറിയിപ്പുകൾ ‘അലർട്ട് റെഡി’ സംവിധാനം വഴി നൽകിയിട്ടുണ്ട്. അടിയന്തരാവസ്ഥയെ അനുകരിക്കുന്ന രീതിയിലായിരിക്കും പരീക്ഷണം. എന്നാൽ, പൊതുജനങ്ങൾ പേടിക്കേണ്ടതില്ലെന്നും യാതൊരു നടപടിയും കൈക്കൊള്ളേണ്ടതില്ലെന്നും അധികൃതർ അറിയിച്ചു.

താമസിക്കുന്ന പ്രവിശ്യയെ അനുസരിച്ച് ടെസ്റ്റ് അലർട്ട് വിവിധ സമയങ്ങളിലായിരിക്കും ലഭിക്കുക:

• ഒന്റാരിയോ – 12:55 PM EST
• ക്യൂബെക്ക് – 1:55 PM EST
• ന്യൂഫിൻലൻഡ് & ലാബ്രഡോർ – 10:45 AM NST
• നോവസ്കോഷ – 1:55 PM AST
• ന്യൂബ്രൺസ്‌വിക്ക് – 10:55 AM AST
• പ്രിൻസ് എഡ്വേർഡ് ഐലൻഡ് – 12:55 PM AST
• ആൽബർട്ട, ബ്രിട്ടിഷ് കൊളംബിയ, മാനിറ്റോബ, സസ്കാച്വാൻ – 1:55 PM
• നൂനവൂട്ട് – 2:00 PM EST
• യൂകോൺ – 1:55 PM YST