വിദേശ വിദ്യാർത്ഥികളുടെ എണ്ണം നിയന്ത്രിക്കാനുള്ള സ്റ്റഡി പെർമിറ്റ് പരിധിയിൽ നിന്ന് മാസ്റ്റേഴ്സ്, പിഎച്ച്ഡി വിദ്യാർത്ഥികളെ ഒഴിവാക്കി കാനഡ. 2026 ജനുവരി മുതൽ മാറ്റങ്ങൾ പ്രാബല്യത്തിൽ വരും. പുതിയ ‘ഇമിഗ്രേഷൻ ലെവൽസ് പ്ലാൻ 2026-28’ പ്രകാരമാണ് ഇളവ്. പൊതുമേഖലാ യൂണിവേഴ്സിറ്റികളിൽ പഠിക്കുന്നവർക്കാണ് ഈ ആനുകൂല്യം ലഭിക്കുക. ഗവേഷണം, അക്കാദമിക മികവ് എന്നിവയിൽ കാനഡയുടെ ആകർഷണീയത നിലനിർത്താനും, ഈ വിദ്യാർത്ഥികൾ പഠനം പൂർത്തിയാക്കിയ ശേഷം കാനഡയിൽ സ്ഥിരതാമസമാക്കാനുള്ള സാധ്യത കൂടുതലാണ് എന്ന വിലയിരുത്തലിന്റെ അടിസ്ഥാനത്തിലുമാണ് ഈ സുപ്രധാന നീക്കം. ഡോക്ടറൽ വിദ്യാർത്ഥികൾക്കും അവരുടെ കുടുംബാംഗങ്ങൾക്കും സ്റ്റഡി പെർമിറ്റ് നടപടികൾ 14 ദിവസത്തിനുള്ളിൽ വേഗത്തിൽ പൂർത്തിയാക്കി നൽകാനും ഇമിഗ്രേഷൻ, റെഫ്യൂജീസ് ആൻഡ് സിറ്റിസൺഷിപ്പ് കാനഡ (IRCC) ലക്ഷ്യമിടുന്നുണ്ട്.
പുതിയ നിയമപ്രകാരം, കാനഡയിലേക്ക് പുതുതായി വരുന്ന രാജ്യാന്തര വിദ്യാർത്ഥികളുടെ എണ്ണത്തിൽ കൃത്യമായ ലക്ഷ്യം നിശ്ചയിച്ചിട്ടുണ്ട്. 2026-ൽ 1.55 ലക്ഷം പുതിയ വിദ്യാർത്ഥികൾക്കും, 2027-ലും 2028-ലും ഓരോ വർഷവും 1.50 ലക്ഷം വിദ്യാർത്ഥികൾക്കുമാണ് പരിധി. നിലവിലുള്ള വിദ്യാർത്ഥികളുടെ പെർമിറ്റ് പുതുക്കൽ ഈ കണക്കിൽ ഉൾപ്പെടുന്നില്ല. താമസ, ആരോഗ്യ സംരക്ഷണ മേഖലകളിലെ സമ്മർദ്ദം കുറയ്ക്കുന്നതിനും സുസ്ഥിരമായ ഇമിഗ്രേഷൻ നിലവാരം ഉറപ്പാക്കുന്നതിനും വേണ്ടിയാണ് നിയന്ത്രണങ്ങൾ ഏർപ്പെടുത്തിയിരിക്കുന്നതെന്ന് IRCC അറിയിച്ചു. 2027 അവസാനത്തോടെ രാജ്യത്തെ താൽക്കാലിക താമസക്കാരുടെ (വിദേശ വിദ്യാർത്ഥികൾ, താൽക്കാലിക തൊഴിലാളികൾ ഉൾപ്പെടെ) എണ്ണം മൊത്തം ജനസംഖ്യയുടെ 5% താഴെയായി നിലനിർത്തുക എന്നതാണ് സർക്കാരിന്റെ ലക്ഷ്യം.
