2026 FIFA ലോകകപ്പ് കാണാൻ പദ്ധതിയിടുന്ന വിദേശീയരായ ആരാധകർക്ക് മുന്നറിയിപ്പുമായി കാനഡ. ലോകകപ്പ് ആസ്വദിക്കാൻ ടൊറന്റോയിലേക്കോ വൻകൂവറിലേക്കോ യാത്ര ചെയ്യുന്നവർ നിർബന്ധമായും തങ്ങളുടെ ക്രിമിനൽ പശ്ചാത്തലം പരിശോധിക്കണം. മദ്യപിച്ച് വാഹനമോടിക്കൽ (DUI), മോഷണം തുടങ്ങിയ ചെറുതോ വലുതോ ആയ ഏത് കുറ്റകൃത്യങ്ങളും കാനഡയുടെ നിയമപ്രകാരം നിങ്ങളെ ക്രിമിനലായി കണക്കാക്കി പ്രവേശനം നിഷേധിക്കാൻ കാരണമാകും. ടിക്കറ്റുകൾ വാങ്ങി യാത്രക്ക് തയ്യാറെടുത്ത ശേഷം അതിർത്തിയിൽ വെച്ച് പ്രവേശനം നിഷേധിക്കപ്പെടുന്നത് ഒഴിവാക്കാൻ, യാത്രാ തീയതിക്ക് മുൻപ് തന്നെ നിയമപരമായ സാധ്യതകൾ മനസ്സിലാക്കി ആവശ്യമായ നടപടിക്രമങ്ങൾ പൂർത്തിയാക്കേണ്ടത് അത്യാവശ്യമാണെന്നും ഫെഡറൽ സർക്കാർ മുന്നറിയിപ്പ് നൽകുന്നു.
അതേസമയം, പ്രവേശന വിലക്ക് മറികടക്കാൻ താൽക്കാലിക റസിഡന്റ് പെർമിറ്റ് (TRP), നിയമപരമായ പുനരധിവാസം (Deemed Rehabilitation), ക്രിമിനൽ പുനരധിവാസം (Criminal Rehabilitation) എന്നിവ ഉപയോഗപ്രദമാകും. ശിക്ഷ പൂർത്തിയാക്കി അഞ്ച് വർഷം കഴിഞ്ഞവർക്ക്, ‘ക്രിമിനൽ പുനരധിവാസം’ വഴി പ്രവേശന വിലക്ക് സ്ഥിരമായി ഇല്ലാതാക്കാൻ സാധിക്കും. നടപടിക്രമങ്ങൾ പൂർത്തിയാക്കാൻ സമയം എടുക്കുമെന്നതിനാൽ, യാത്ര സുഗമമാക്കാൻ ഒരു കുടിയേറ്റ നിയമജ്ഞന്റെ സഹായം തേടുകയും അപേക്ഷകൾ വേഗത്തിൽ സമർപ്പിക്കുകയും ചെയ്യുന്നത് ആരാധകർക്ക് ഉപകാരപ്രദമാണ്.
