നൈപുണ്യ വികസന ഫണ്ട് വിതരണം ചെയ്തതിലെ ക്രമക്കേടുകളെ തുടർന്ന് കടുത്ത വിമർശനം നേരിട്ട് ഒൻ്റാരിയോയിലെ തൊഴിൽ മന്ത്രി ഡേവിഡ് പിച്ചിനി. $2.5 ബില്യൺ ഡോളറിൻ്റെ ഈ ഫണ്ട് നീതിയുക്തമോ, സുതാര്യമോ ആയിട്ടല്ല വിതരണം ചെയ്തതെന്നാണ് അടുത്തിടെ പുറത്തുവന്ന ഓഡിറ്റർ ജനറലിൻ്റെ റിപ്പോർട്ട് വ്യക്തമാക്കുന്നത്. പദ്ധതികളുടെ തിരഞ്ഞെടുപ്പിൽ മന്ത്രിയുടെ ഓഫീസ് നേരിട്ട് ഇടപെടുകയും, താഴ്ന്ന സ്കോർ ലഭിച്ച അപേക്ഷകൾക്ക് പോലും ഉദ്യോഗസ്ഥരുടെ ശുപാർശകളെ മറികടന്ന് ഫണ്ട് നൽകുകയും ചെയ്തതായി റിപ്പോർട്ടിൽ പറയുന്നു. ഇത് സർക്കാരിൻ്റെ ഫണ്ട് വിതരണത്തിൽ രാഷ്ട്രീയ സ്വാധീനമുണ്ടായി എന്ന ആരോപണത്തിന് കാരണമായിട്ടുണ്ട്.
ഓഡിറ്റർ ജനറലിൻ്റെ റിപ്പോർട്ടിന് പിന്നാലെ പ്രതിപക്ഷ പാർട്ടികൾ ഒന്നടങ്കം മന്ത്രി ഡേവിഡ് പിച്ചിനിയുടെ രാജി ആവശ്യപ്പെട്ടു. രാഷ്ട്രീയ സ്വാധീനമുള്ളവരുടെ കയ്യിലെ കളിപ്പാവയായി ഫണ്ടുകളെ സർക്കാർ മാറ്റി എന്നാണ് പ്രതിപക്ഷത്തിൻ്റെ ആരോപണം. എന്നാൽ താൻ രാജിവെക്കില്ലെന്നും, ഫണ്ട് ആയിരക്കണക്കിന് ആളുകൾക്ക് പരിശീലനം നൽകാൻ സഹായിച്ച ഒരു നല്ല പദ്ധതിയാണെന്നും മന്ത്രി പിച്ചിനി പ്രതികരിച്ചു. അതേസമയം, ചില ലോബിയിസ്റ്റുകൾ വഴി അപേക്ഷിച്ചവർക്ക് ഫണ്ട് ലഭിച്ചതായുള്ള കണ്ടെത്തൽ, ഫണ്ട് വിതരണത്തിലെ സുതാര്യതയെക്കുറിച്ചുള്ള ആശങ്കകൾ വർദ്ധിപ്പിക്കുകയും, പൊതുജനവിശ്വാസം ഇല്ലാതാക്കുകയും ചെയ്തിട്ടുണ്ട്.
