അവയവ മാറ്റിവയ്ക്കലിന് പ്രത്യേക രക്തഗ്രൂപ്പുകളുടെ ആവശ്യം ഇല്ലാതാക്കാൻ എൻസൈമുകൾ വികസിപ്പിച്ച് യുബിസി ഗവേഷകർ. എ ഗ്രൂപ്പ് രക്തമുള്ള ഒരാൾ ദാനം ചെയ്ത അവയവം, എല്ലാവർക്കും സ്വീകരിക്കാൻ കഴിയുന്ന ഒ ഗ്രൂപ്പിലേക്ക് മാറ്റാൻ സഹായിക്കുന്ന എൻസൈമാണ് യുബിസി ഗവേഷകർ സൃഷ്ടിച്ചത്. ദാനം ചെയ്ത അവയവങ്ങൾ ശരീരം നിരസിക്കാനുള്ള സാധ്യത കുറയ്ക്കാൻ ഈ പ്രത്യേക എൻസൈമുകൾ സഹായിക്കുമെന്ന് ഗവേഷണ ഫലങ്ങൾ സൂചിപ്പിക്കുന്നു.
UBC പുറത്തിറക്കിയ വാർത്താക്കുറിപ്പ് അനുസരിച്ച്, എൻസൈം ഉപയോഗിച്ച് മാറ്റം വരുത്തിയ ഒരു വൃക്ക, കുടുംബാംഗങ്ങളുടെ സമ്മതത്തോടെ മസ്തിഷ്ക മരണം സംഭവിച്ച ഒരാളിൽ വെച്ചുപിടിപ്പിച്ചു. ഈ വൃക്ക, മസ്തിഷ്ക മരണം സംഭവിച്ച ശരീരത്തിൽ യാതൊരു നിരസിക്കൽ ലക്ഷണങ്ങളും കൂടാതെ പ്രവർത്തിച്ചു. മൂന്നാം ദിവസം മാത്രമാണ് ശരീരത്തിൽ നേരിയ പ്രതികരണം കാണിച്ചത്.
എന്നാൽ സാധാരണയായി ഇത്തരം സാഹചര്യങ്ങളിൽ ഉണ്ടാകുന്നതിനേക്കാൾ വളരെ കുറഞ്ഞ പ്രശ്നങ്ങൾ മാത്രമാണ് ഉണ്ടായത്, കൂടാതെ ശരീരം ഈ അവയവത്തെ അംഗീകരിച്ചു തുടങ്ങുന്നതിൻ്റെ ലക്ഷണങ്ങളും ദൃശ്യമായതായി വാർത്താക്കുറിപ്പിലുണ്ട്. UBC-യിലെ പതോളജി ആൻഡ് ലബോറട്ടറി മെഡിസിൻ വിഭാഗത്തിലെയും സെൻ്റർ ഫോർ ബ്ലഡ് റിസർച്ചിലെയും പ്രൊഫസർമാരാണ് പ്രത്യേക എൻസൈമുകളുടെ വികസനത്തിലേക്ക് നയിച്ച ഈ ഗവേഷണത്തിന് നേതൃത്വം നൽകിയത്.
