ആൽബെർട്ടയിൽ 1,300 പേരെ നിയമിക്കാനൊരുങ്ങി ആമസോൺ. അവധിക്കാല സീസൺ കൂടി മുന്നിൽക്കണ്ടാണ് ഇത്. കാനഡയിലുടനീളം ഏഴായിരം പേരെ നിയമിക്കാനും കമ്പനി ലക്ഷ്യമിടുന്നത്. തൊഴിലന്വേഷകർക്ക് ഇത് വലിയൊരു അവസരമായാണ് വിലയിരുത്തപ്പെടുന്നത്. ഒക്ടോബറിൽ തുടങ്ങി ഡിസംബർ വരെയുള്ള മാസങ്ങളിലാണ് നിയമനങ്ങൾ നടത്തുക.
ആൽബർട്ടയിലെ ഫുൾഫിൽമെൻ്റ് സെൻ്റർ, സോർട്ടേഷൻ സെൻ്റർ, ഡെലിവറി സ്റ്റേഷൻ എന്നിവിടങ്ങളിലേക്കാണ് പുതിയ നിയമനങ്ങൾ. യോഗ്യരായ ജീവനക്കാരുടെ ശരാശരി മണിക്കൂർ വേതനം 24.50 ഡോളറായി ആമസോൺ വർദ്ധിപ്പിച്ചിട്ടുമുണ്ട്. 2024 നെ അപേക്ഷിച്ച് 4.3 ശതമാനമാണ് വർധന. കാൽഗറിയിൽ ഏകദേശം 700 പേർക്കും എഡ്മണ്ടണിൽ ഏകദേശം 550 പേർക്കും ജോലി ലഭിക്കും. കോമ്പൻസേഷൻ, ജോലിസ്ഥലത്തെ ആനുകൂല്യങ്ങൾ എന്നിവയ്ക്കായി നല്ലൊരു തുക മാറ്റിവയ്ക്കാനാണ് ആമസോണിൻ്റെ തീരുമാനം. 2025 ൽ മാത്രം, ശമ്പള വർദ്ധനവിനും യോഗ്യരായ ജീവനക്കാർക്കുള്ള മറ്റ് തരത്തിലുള്ള ആനുകൂല്യങ്ങൾക്കുമായി 110 മില്യൺ ഡോളറിലധികം നിക്ഷേപിക്കാനാണ് കമ്പനി പദ്ധതിയിടുന്നത്.
