കാൽഗറി: കഴിഞ്ഞ വർഷത്തെ അപേക്ഷിച്ച് കാൽഗറിയിൽ ഓഗസ്റ്റ് മാസം ഭവന വിൽപ്പന 9 ശതമാനം ഇടിഞ്ഞതായി കാൽഗറി റിയൽ എസ്റ്റേറ്റ് ബോർഡ് റിപ്പോർട്ട്. എന്നാൽ വിൽപ്പന കുറഞ്ഞുവെങ്കിലും ദീർഘകാല പ്രവണതകൾക്ക് മുകളിലാണെന്നും ഇത് താരതമ്യേന ശക്തമായ ഡിമാൻഡിനെ പ്രതിഫലിക്കുന്നതാണെന്നും ബോർഡ് ചൂണ്ടിക്കാട്ടുന്നു. ഓഗസ്റ്റിൽ 8.8 ശതമാനം ഇടിവാണ് ഭവന വിലയിൽ ഉണ്ടായത്. 2024 ഓഗസ്റ്റിൽ 2,182 വീടുകളുടെ വിൽപ്പനയാണ് നടന്നത്. എന്നാൽ ഈ വർഷം ഓഗസ്റ്റിൽ 1,989 വീടുകളാണ് കൈമാറ്റം ചെയ്യപ്പെട്ടതെന്ന് ബോർഡ് വ്യക്തമാക്കി.

കഴിഞ്ഞ മാസം വിപണിയിൽ 3,478 പുതിയ ലിസ്റ്റിംഗുകൾ ഉണ്ടായിരുന്നു. കഴിഞ്ഞ വർഷത്തെ അപേക്ഷിച്ച് 1.7 ശതമാനം കുറവ്. നഗരത്തിലെ ഇൻവെന്ററി 48.2 ശതമാനം വർധിച്ച് 6,661 വീടുകൾ വിൽപ്പനയ്‌ക്കെത്തി. മെച്ചപ്പെട്ട വിതരണം വിലയിടിവിന് കാരണമായി. കഴിഞ്ഞ മാസം റെസിഡൻഷ്യൽ ബെഞ്ച്മാർക്ക് വില കഴിഞ്ഞ വർഷത്തെ അപേക്ഷിച്ച് 4.1 ശതമാനം കുറഞ്ഞ് 577,200 ഡോളറായതായി ബോർഡ് പറയുന്നു.