സ്റ്റുഡന്റ് പെര്മിറ്റ് അപേക്ഷകള് മാസങ്ങളോളം വൈകിപ്പിക്കുന്ന കാനഡ സര്ക്കാരിന്റെ നടപടിക്കെതിരെ നിരവധി ചൈനീസ് വിദ്യാര്ത്ഥികള് രംഗത്ത്. തങ്ങളുടെ അപേക്ഷകള് മനഃപൂര്വം വൈകിപ്പിച്ച് വിവേചനം കാണിക്കുന്നുവെന്ന് ആരോപിച്ചാണ് ഇവര് ഫെഡറല് കോടതിയില് കേസുമായി സമീപിച്ചത്. ഇരുപത്തിയഞ്ച് വിദ്യാര്ത്ഥികളാണ് കേസ് ഫയല് ചെയ്തിരിക്കുന്നത്.
സുരക്ഷാ പരിശോധനയുടെ പേരില് തങ്ങളുടെ ഫയലുകള് അന്യായമായി വൈകിപ്പിക്കുകയാണെന്ന് ഇവര് ആരോപിക്കുന്നു. എല്ലാവരും സയന്സ്, ടെക്നോളജി, എന്ജിനീയറിങ്, മാത്തമാറ്റിക്സ് (STEM) വിഷയങ്ങളില് ഉന്നത പഠനത്തിനായി UBC, മക്ഗില്, വാട്ടര്ലൂ യൂണിവേഴ്സിറ്റി തുടങ്ങിയ പ്രമുഖ സ്ഥാപനങ്ങളില് പ്രവേശനം നേടിയവരാണ്. കോടതിയില് നിന്ന് വേഗത്തില് ഒരു തീരുമാനമുണ്ടാകുമെന്നാണ് വിദ്യാര്ത്ഥികളുടെ പ്രതീക്ഷ.
