ഓട്ടവ: കാനഡയിൽ ചെള്ള് പരത്തുന്ന രോഗമായ റോക്കി മൗണ്ടെയ്ൻ സ്പോട്ടഡ് ഫീവർ പകരുന്നതായി റിപ്പോർട്ട്. ഒന്റാരിയോയിലും ക്യുബെക്കിലും ഈ വർഷം രോഗബാധ റിപ്പോർട്ട് ചെയ്യപ്പെട്ടിട്ടുണ്ട്. ഈ വർഷമാദ്യം ഒന്റാരിയോയിൽ നായ്ക്കളിലും ഈ രോഗം റിപ്പോർട്ട് ചെയ്തിരുന്നു. റിക്കെറ്റ്സിയ റിക്കെറ്റ്സി എന്ന ബാക്ടീരിയ മൂലമുണ്ടാകുന്ന രോഗമാണ് റോക്കി മൗണ്ടെയ്ൻ സ്പോട്ടഡ് ഫീവർ.
1890 കളിൽ ഇഡാഹോയിലെയും മൊണ്ടാനയിലെയും റോക്കി മൗണ്ടെയ്ൻ താഴ്വരകളിലാണ് ആദ്യമായി ഈ ചെള്ളുകളെ തിരിച്ചറിഞ്ഞത്. അതിനാലാണ് റോക്കി മൗണ്ടെയ്ൻ ടിക്ക് എന്ന് വിശേഷിപ്പിക്കുന്നത്.
മനുഷ്യരിൽ രോഗം ബാധിച്ചു കഴിഞ്ഞാൽ പനി, തലവേദന, ഓക്കാനം, ഛർദ്ദി, വയറുവേദന, പേശി വേദന, വിശപ്പില്ലായ്മ എന്നിവയാണ് രോഗ ലക്ഷണങ്ങൾ. സാധാരണ ആന്റിബയോട്ടിക് ആയ ഡോക്സിസൈക്ലിൻ ഉപയോഗിച്ച് ഈ രോഗം ചികിത്സിക്കാം. മിക്ക ആളുകളുടെ രോഗം ചികിത്സയ്ക്ക് ശേഷം പൂർണമായി സുഖം പ്രാപിക്കുന്നുണ്ട്. എന്നാൽ ചികിത്സ നൽകിയാലും അഞ്ച് മുതൽ 10 ശതമാനം വരെ കേസുകളിൽ രോഗം ഗുരുതരമായേക്കാമെന്ന് യുഎസ് ആസ്ഥാനമായുള്ള ക്ലീവ്ലാൻഡ് ക്ലിനിക് റിപ്പോർട്ട് ചെയ്യുന്നു.
