മെച്ചപ്പെട്ട വേതനവും തൊഴിൽ സാഹചര്യങ്ങളും ആവശ്യപ്പെട്ട് എയർ കാനഡ ഫ്ലൈറ്റ് അറ്റൻഡന്റുകൾ ഇന്ന് രാജ്യത്തെ നാല് പ്രധാന വിമാനത്താവളങ്ങളിൽ പ്രതിഷേധ പ്രകടനം നടത്തും. മൺട്രിയോളിലെ പിയറി എലിയറ്റ് ട്രൂഡോ ഇന്റർനാഷണൽ എയർപോർട്ട്, ടൊറന്റോ പിയേഴ്സൺ ഇന്റർനാഷണൽ എയർപോർട്ട്, വൻകൂവർ ഇന്റർനാഷണൽ എയർപോർട്ട്, കാൽഗറി ഇന്റർനാഷണൽ എയർപോർട്ട് എന്നിവിടങ്ങളിൽ ഉച്ചയ്ക്ക് 1 മണിക്ക് പ്രതിഷേധ പ്രകടനങ്ങൾ നടക്കുമെന്ന് കനേഡിയൻ യൂണിയൻ ഓഫ് പബ്ലിക് എംപ്ലോയീസ് (CUPE) അറിയിച്ചു. മെച്ചപ്പെട്ട വേതനം, ആനുകൂല്യങ്ങൾ, തൊഴിൽ സാഹചര്യങ്ങൾ എന്നിവ ഉറപ്പാക്കുന്നതിന് വേണ്ടിയാണ് പ്രതിഷേധം സംഘടപ്പിക്കുന്നതെന്നും CUPE പറഞ്ഞു.

കഴിഞ്ഞ ചൊവ്വാഴ്ച നടന്ന വോട്ടെടുപ്പ് പ്രകാരം, ഓഗസ്റ്റ് 16 ന് ഫ്ലൈറ്റ് അറ്റൻഡന്റുകൾ പണിമുടക്കാൻ സാധ്യതയുണ്ട്. വർഷാരംഭം മുതൽ ആരംഭിച്ച കരാർ ചർച്ച വിജയത്തിലെത്താത്ത സാഹചര്യത്തിലാണ് ജീവനക്കാർ പണിമുടക്കിനൊരുങ്ങുന്നത്.