ഒൻ്റാരിയോയിൽ നടന്ന കനേഡിയൻ നാഷണൽ എക്സിബിഷൻ ജോബ് ഫെയറിൽ അഭിമുഖത്തിനായി എത്തിയത് ആയിരക്കണക്കിന് യുവാക്കൾ. യുവാക്കളുടെ തൊഴിലില്ലായ്മ നിരക്ക് ഉയർന്ന തോതിൽ തുടരുന്നതിനിടെയാണിത്. 5,000-ത്തിലധികം സീസണൽ തസ്തികകളിലേക്ക് 54,000-ത്തിലധികം ഓൺലൈൻ അപേക്ഷകൾ ലഭിച്ചതായി സിഎൻഇ അറിയിച്ചു. രണ്ടാഴ്ച നീണ്ടുനിന്ന മേളയിൽ കാഷ്യർമാർ, റീട്ടെയിൽ അസോസിയേറ്റ്സ്, ഗെയിം അറ്റൻഡൻ്റ്സ്, ഫുഡ് സർവീസ് സ്റ്റാഫ്, മിഡ്വേ ഓപ്പറേറ്റർമാർ, ഇൻഫർമേഷൻ ഗൈഡുകൾ തുടങ്ങി സീസണൽ തസ്തികളിലേക്ക് ഉൾപ്പെടെ അപേക്ഷ സ്വീകരിക്കുന്നുണ്ട്.
ഇതുവരെ ലഭിച്ചതിൽ വച്ച് ഏറ്റവും കൂടുതൽ അപേക്ഷകൾ ഇതാണെന്ന് സംഘാടകർ പറഞ്ഞു. യുവാക്കളുടെ തൊഴിലില്ലായ്മ രൂക്ഷമായൊരു തൊഴിൽ വിപണിയുടെ പ്രതിഫലനമാണിതെന്ന് അധികൃതർ പറഞ്ഞു. ഏകദേശം 4,000 ഉദ്യോഗാർത്ഥികൾ ജോബ് ഫെയറിൽ പങ്കെടുത്തതായി സിഎൻഇ കണക്കാക്കുന്നു. ബുധനാഴ്ച പുലർച്ചെ 5 മണിക്ക് ശേഷം എത്തിത്തുടങ്ങിയ അപേക്ഷകരെ 24 ബൂത്തുകളിലായാണ് അഭിമുഖം നടത്തിയത്. ഒൻ്റാരിയോയിൽ 15 നും 24 നും ഇടയിൽ പ്രായമുള്ളവരുടെ തൊഴിലില്ലായ്മ നിരക്ക് ജൂണിൽ 15.8 ശതമാനമായിരുന്നു.
