ടൊറൻ്റോ: യുവാക്കളുടെ തൊഴിലില്ലായ്മ കുതിച്ചുയരുന്നതിനാൽ ടൊറൻ്റോയിൽ നടക്കാനിരിക്കുന്ന സിഎൻഇ ജോബ് ഫെയറിൽ റെക്കോർഡ് ജനപങ്കാളിത്തമാണ് അധികൃതർ പ്രതീക്ഷിക്കുന്നത്. ടൊറൻ്റോയിലെ കനേഡിയൻ നാഷണൽ എക്സിബിഷൻ (സിഎൻഇ) ചരിത്രത്തിലെ ഏറ്റവും തിരക്കേറിയ നിയമന പരിപാടികളിലൊന്നിനാണ് ഒരുങ്ങുന്നത്. വാർഷിക തൊഴിൽ മേളയിൽ ആയിരക്കണക്കിന് തൊഴിലന്വേഷകർ പങ്കെടുക്കുമെന്നാണ് പ്രതീക്ഷ.
കനേഡിയൻ യുവാക്കൾക്കിടയിൽ തൊഴിലില്ലായ്മ രൂക്ഷമാണ്. 14 മുതൽ 24 വയസ്സ് വരെ പ്രായമുള്ളവർക്കിടയിലെ തൊഴിലില്ലായ്മ ഏകദേശം 14 ശതമാനമാണെന്ന് സ്റ്റാറ്റിസ്റ്റിക്സ് കാനഡ റിപ്പോർട്ട് ചെയ്യുന്നു. ഒൻ്റാരിയോയിൽ ജോലിയില്ലാത്തവരിൽ നാലിൽ ഒരാൾ കൗമാരക്കാരാണ്. പതിറ്റാണ്ടുകൾക്കിടയിലെ ഏറ്റവും ഉയർന്ന നിരക്കാണ് ഇത്. കാനഡയിലെ ഏറ്റവും വലിയ മേളയിൽ സീസണൽ തസ്തികകളിലേക്ക് സിഎൻഇക്ക് ഇതിനകം 54,000 ഓൺലൈൻ അപേക്ഷകൾ ലഭിച്ചു കഴിഞ്ഞു.
കാഷ്യർമാർ, ഗെയിം അറ്റൻഡൻ്റുകൾ, ഫുഡ് സർവീസ് വർക്കർമാർ, മിഡ്വേ ഓപ്പറേറ്റർമാർ, ഇൻഫർമേഷൻ ഗൈഡുകൾ എന്നിവയുൾപ്പെടെ 5,000-ത്തിലധികം ജോലികൾ ഈ വേനൽക്കാലത്ത് ലഭ്യമാണ്. ആഗസ്റ്റ് 15 നാണ് മേളയ്ക്ക് തുടക്കമാവുക. കഴിഞ്ഞ വർഷം 1.5 ദശലക്ഷം പേർ മേള സന്ദർശിച്ചിരുന്നു.
