ഓട്ടവ: കാനഡയിൽ ഏറ്റവും കൂടുതൽ കുറ്റകൃത്യങ്ങൾ നടക്കുന്ന മെട്രോ നഗരങ്ങളിൽ ബ്രിട്ടീഷ് കൊളംബിയ ഒന്നാം സ്ഥാനത്തും ആൽബെർട്ട രണ്ടാം സ്ഥാനത്തും. കാനഡയിൽ പോലീസ് റിപ്പോർട്ട് ചെയ്യുന്ന കുറ്റകൃത്യങ്ങളുടെ എണ്ണവും കുറ്റകൃത്യ തീവ്രതയും(CSI) അനുസരിച്ച് സ്റ്റാറ്റിസ്റ്റിക്‌സ് കാനഡയാണ് റിപ്പോർട്ട് പുറത്തിറക്കിയത്. കുറ്റകൃത്യനിരക്ക് തുടർച്ചയായി മൂന്ന് വർഷത്തെ വർധനവിനെ തുടർന്ന് 2024 ൽ നാല് ശതമാനം കുറഞ്ഞതായി റിപ്പോർട്ടിൽ പറയുന്നു.

ആൽബെർട്ടയുടെ മൊത്തത്തിലുള്ള CSI മൂല്യം 95.6 ആണ്. ഇത് ദേശീയ ശരാശരിയായ 77.9 നേക്കാൾ വളരെ കൂടുതലാണ്. ബ്രിട്ടീഷ് കൊളംബിയയും സമാനമായ സിഎസ്‌ഐ മൂല്യമാണുള്ളത്. അയൽപ്രവിശ്യയായ സസ്‌ക്കാച്ചെവനേക്കാൾ വളരെ താഴെയുമാണ്.
സെൻസസ് മെട്രോപൊളിറ്റൻ പ്രദേശങ്ങളിൽ( CMA) കാനഡയിലെ ഏറ്റവും ഉയർന്ന കുറ്റകൃത്യ നിരക്ക് റെഡ് ഡീറിലാണെന്നും സ്റ്റാറ്റിസ്റ്റിക്‌സ് കാനഡ പറയുന്നു. 100,000 ജനസംഖ്യയിൽ 10,650 എന്ന നിരക്കിലാണിത്. ദേശീയ കുറ്റകൃത്യ നിരക്കായ 5,672 നേക്കാൾ വളരെ കൂടുതലാണിത്. അതേസമയം, ആൽബെർട്ടയിലെ മറ്റ് നഗരങ്ങളായ എഡ്മന്റൺ, കാൽഗറി എന്നിവടങ്ങളിൽ യഥാക്രമം 7,108, 4,796 എന്നിങ്ങനെയാണ് നിരക്ക്. 2024 ൽ ഏറ്റവും ഉയർന്ന കുറ്റകൃത്യ നിരക്കുള്ള നഗരം ബീസിയിലെ ചില്ലിവാക്ക് ആണ്.