ഓട്ടവ: കാനഡയിൽ യുവാക്കളുടെ തൊഴിലില്ലായ്മ നിരക്ക് വളരെയധികം ഉയരുന്നു. ലോകത്തിലെ പ്രധാന സമ്പദ്വ്യവസ്ഥകളിൽ വച്ച് കാനഡയിലാണ് യുവാക്കളുടെ തൊഴിലില്ലായ്മയിൽ ഏറ്റവും വലിയ കുതിച്ചുചാട്ടം ഉണ്ടായത്. 15നും 24നും ഇടയിൽ പ്രായമുള്ള കനേഡിയക്കാരുടെ തൊഴിലില്ലായ്മ നിരക്ക് കഴിഞ്ഞ രണ്ട് വർഷത്തിനിടെ 3.6 ശതമാനം വർദ്ധിച്ചുവെന്ന് ഓർഗനൈസേഷൻ ഫോർ ഇക്കണോമിക് കോ-ഓപ്പറേഷൻ ആൻഡ് ഡെവലപ്മെൻ്റ് പറയുന്നു. 25 മുൻനിര സമ്പദ്വ്യവസ്ഥകളിൽ ഏറ്റവും വലിയ കുതിപ്പാണിത്.
മെയ് മാസത്തിലെ കണക്കനുസരിച്ച്, 15 നും 24 നും ഇടയിൽ പ്രായമുള്ള കനേഡിയൻ വിദ്യാർത്ഥികളുടെ തൊഴിലില്ലായ്മ 20.1 ശതമാനമായിരുന്നു. 90-കളുടെ മധ്യത്തിനു ശേഷമുള്ള ഏറ്റവും ഉയർന്ന നിരക്കാണിത്. യുവാക്കളുടെ തൊഴിലില്ലായ്മ ദീർഘകാല തൊഴിൽ വിപണിയെ ബാധിക്കുമെന്ന് ആശങ്കയും ഉയരുന്നുണ്ട്. കാരണം നിരവധി യുവാക്കൾക്ക് ആദ്യകാല ജോലി പരിചയം നഷ്ടപ്പെടുന്നു. എക്സ്പീരിയൻസ് ഇല്ലാതെ ദീർഘകാല കരിയർ സാധ്യതകൾ കണ്ടെത്തുന്നത് കൂടുതൽ ബുദ്ധിമുട്ടായിരിക്കും.
കാനഡ സമ്മർ ജോബ്സ് പ്രോഗ്രാം വിപുലീകരിച്ചുകൊണ്ട് കൂടുതൽ യുവാക്കളെ ജോലിക്കെടുക്കാൻ ഫെഡറൽ സർക്കാർ ശ്രമിക്കുന്നുണ്ടെങ്കിലും പ്രശ്നത്തിൻ്റെ മൂലകാരണം തൊഴിൽ വിപണിയിലെ പൊതുവെയുള്ള ദൌർബല്യമാണ്. യുവാക്കളുടെ തൊഴിൽ പ്രശ്നം കൂടുതൽ വഷളാകുമെന്ന ആശങ്കയും നിലനിൽക്കുന്നുണ്ട്. വ്യാപാര യുദ്ധം സമ്പദ്വ്യവസ്ഥയെ തളർത്തുകയും ഒപ്പം എൻട്രി ലെവലിൽ എഐയുടെ കടന്നു വരവും ഈ പ്രശ്നത്തെ കൂടുതൽ സങ്കീർണ്ണമാക്കുന്നു.
