ആല്ബര്ട്ടയിലെ ബാന്ഫ് നാഷണല് പാര്ക്കിലെ ബോ ഗ്ലേസിയര് ഫോള്സില് പാറയിടിഞ്ഞു വീണ് ഒരാള് മരിച്ചതായി ആര്സിഎംപി റിപ്പോര്ട്ട് ചെയ്തു. നിരവധിയാളുകള്ക്ക് പരുക്കേറ്റതായും അധികൃതര് അറിയിച്ചു. ഐസ്ഫീല്ഡ്സ് പാര്ക്ക്വേയിലെ (ഹൈവേ 93 നോര്ത്ത്) ലേക്ക് ലൂയിസില് നിന്ന് ഏകദേശം 37 കിലോമീറ്റര് അകലെ വ്യാഴാഴ്ച ഉച്ചകഴിഞ്ഞാണ് സംഭവം.
ബാന്ഫ്, ജാസ്പര് നാഷണല് പാര്ക്കുകളില് നിന്നുള്ള പാര്ക്ക്സ് കാനഡ വിസിറ്റേഴ്സ് സേഫ്റ്റി ടീം മറ്റ് ഏജന്സികളുടെ സഹായത്തോടെ രക്ഷാപ്രവര്ത്തനം നടത്തുന്നതായി പാര്ക്ക്സ് കാനഡ അറിയിച്ചു. സംഭവത്തെ തുടര്ന്ന് പ്രദേശത്ത് ഗതാഗത തടസം പ്രതീക്ഷിക്കുന്നതായി പാര്ക്ക്സ് കാനഡ മുന്നറിയിപ്പ് നല്കി. രക്ഷാപ്രവര്ത്തനത്തിന്റെ ഭാഗമായി ബോ ലേക്കിന് സമീപമുള്ള ഹൈവേ 93N (ഐസ്ഫീല്ഡ്സ് പാര്ക്ക്വേ) താല്ക്കാലികമായി അടച്ചിടുമെന്ന് ലേക്ക് ലൂയിസ് യോഹോ കൂട്ടെനെ ഫീല്ഡ് യൂണിറ്റ് പറഞ്ഞു. മറ്റ് വിവരങ്ങളൊന്നും ലഭ്യമല്ല.
