ന്യൂയോർക്ക്: ആഗോള സാങ്കേതിക ഭീമനായ മെറ്റ (Meta) തങ്ങളുടെ ഇന്ത്യയിലെ പ്രവർത്തനങ്ങളുടെ തലവനായി അരുൺ ശ്രീനിവാസിനെ നിയമിച്ചു ജൂലൈ ഒന്നിന് അരുൺ ശ്രീനിവാസൻ ചുമതല ഏറ്റെടുക്കും. നിലവിൽ മെറ്റയുടെ ഇന്ത്യയിലെ പരസ്യ ബിസിനസ് വിഭാഗം മേധാവിയാണ് അരുൺ ശ്രീനിവാസ്. അദ്ദേഹത്തിന്റെ നിയമനം ഇന്ത്യൻ വിപണിയിൽ മെറ്റയുടെ വളർച്ചാ തന്ത്രങ്ങൾക്ക് നിർണായകമായ ഒരു ചുവടുവെയ്പ്പായി വിലയിരുത്തപ്പെടുന്നു.
മൂന്ന് പതിറ്റാണ്ടിലേറെ നീണ്ട പ്രവർത്തന പരിചയവുമായാണ് അരുൺ ശ്രീനിവാസ് മെറ്റയുടെ ഇന്ത്യയിലെ തലപ്പത്തേക്ക് എത്തുന്നത്. ഐഐഎം കൊൽക്കത്തയിൽ നിന്ന് ബിരുദാനന്തര ബിരുദം നേടിയ അരുൺ, ഹിന്ദുസ്ഥാൻ യൂണിലിവർ, റീബോക്ക്, ഓല, വെസ്റ്റ്ബ്രിജ് ക്യാപിറ്റൽ തുടങ്ങിയ പ്രമുഖ സ്ഥാപനങ്ങളിൽ സെയിൽസ്, മാർക്കറ്റിങ് എന്നീ മേഖലകളിൽ നേതൃത്വപരമായ സ്ഥാനങ്ങൾ വഹിച്ചിട്ടുണ്ട്. ഈ അനുഭവ സമ്പത്ത് മെറ്റയുടെ ഇന്ത്യൻ പ്രവർത്തനങ്ങൾക്ക് കൂടുതൽ കരുത്ത് പകരുമെന്ന് പ്രതീക്ഷിക്കുന്നു.
