ന്യൂഡൽഹി: ‘ചലോ സംസദ്’ മാർച്ചിനിടെ പൊലീസിന്റെ പെല്ലറ്റ് പ്രയോഗത്തിൽ ഗുരുതരമായി പരിക്കേറ്റ 28 കാരനായ സ്പോർട്സ് മാധ്യമപ്രവർത്തകൻ സർക്കാരിൽ നിന്ന് അർഹമായ നഷ്ടപരിഹാരം ആവശ്യപ്പെടുന്നു. ‘ഔട്ട്ലുക്ക്’ മാധ്യമത്തിൽ പ്രവർത്തിക്കുന്ന ഇയാളുടെ ശരീരത്തിൽ 30-ലധികം പെല്ലറ്റ് തരികൾ ഇനിയും നീക്കം ചെയ്യാനാകാത്തവിധം തറച്ചിരിപ്പുണ്ട്. പരിക്കുകളുടെ വേദന വകവെക്കാതെ വീട്ടിലിരുന്ന് ജോലി തുടരുന്ന ഇയാൾ, ഡൽഹി സഫ്ദർജങ് ആശുപത്രി നൽകിയ വൈദ്യപരിശോധനാ റിപ്പോർട്ടിന്റെ അടിസ്ഥാനത്തിലാണ് നീതിക്കായി രംഗത്തെത്തിയത്.
ചോദ്യപേപ്പർ ചോർച്ചയിൽ കേന്ദ്ര സർക്കാരിന്റെ മറുപടി ആവശ്യപ്പെട്ടും വിദ്യാഭ്യാസ മന്ത്രി ധർമേന്ദ്ര പ്രധാൻ രാജി വെക്കണമെന്നാവശ്യപ്പെട്ടും കോക്ക്റോച്ച് ജനതാ പാർട്ടി സംഘടിപ്പിച്ച പ്രതിഷേധ മാർച്ചിനിടെ ജന്തർ മന്ദിറിന് സമീപത്തുവെച്ചാണ് ഇയാൾക്ക് പരിക്കേറ്റത്. കർഷക നേതാവ് സോനം വാങ്ചുക്കിനെ പൊലീസ് കസ്റ്റഡിയിലെടുത്തതോടെയാണ് പ്രതിഷേധത്തിന്റെ ഭാഗമാകാൻ ഇയാൾ തീരുമാനിച്ചത്. വൈകുന്നേരം നാലു മണിയോടെ സംഘർഷം രൂക്ഷമാവുകയും പൊലീസ് കണ്ണീർവാതകവും പെല്ലറ്റ് തോക്കുകളും ജനക്കൂട്ടത്തിനു നേരെ പ്രയോഗിക്കുകയുമായിരുന്നു. ഓടി രക്ഷപ്പെടാൻ ശ്രമിക്കുന്നതിനിടെയാണ് മാധ്യമപ്രവർത്തകന്റെ മുതുകിൽ പെല്ലറ്റ് അടിയേറ്റത്.
ആദ്യഘട്ടത്തിൽ തീപിടിക്കുന്നതുപോലുള്ള കടുത്ത വേദന അനുഭവപ്പെട്ട ഇയാൾ, പൊലീസിന്റെ കടുത്ത നിയന്ത്രണങ്ങൾ കാരണം ഒരു മണിക്കൂറോളം കാത്തുനിന്ന ശേഷമാണ് സുഹൃത്തിന്റെ വീട്ടിലെത്തിയത്. രക്തത്തിൽ കുതിർന്ന വസ്ത്രങ്ങൾ കണ്ട സുഹൃത്ത് മുറിവുകളുടെ ചിത്രമെടുത്ത് ചാറ്റ് ജി.പി.ടി വഴി പരിശോധിച്ചപ്പോഴാണ് പെല്ലറ്റ് ആഘാതമാണെന്ന സംശയം ഉയർന്നത്. തുടർന്ന് സഫ്ദർജങ് ആശുപത്രിയിൽ എത്തിച്ച് നടത്തിയ സി.ടി സ്കാൻ, എം.ആർ.ഐ, എക്സ്-റേ പരിശോധനകളിലാണ് ശരീരത്തിനുള്ളിൽ മുപ്പതിലധികം പെല്ലറ്റ് തരികൾ ഉണ്ടെന്ന് ഡോക്ടർമാർ സ്ഥിരീകരിച്ചത്.
എന്നാൽ, ആഴത്തിൽ തറച്ച പെല്ലറ്റുകൾ ശസ്ത്രക്രിയ വഴി പുറത്തെടുക്കാൻ ശ്രമിക്കുന്നത് ശരീരത്തിന് കൂടുതൽ ആഘാതവും അപകടവും ഉണ്ടാക്കുമെന്നാണ് ഡോക്ടർമാരുടെ വിലയിരുത്തൽ. അതിനാൽ ഇവ ശരീരത്തിനുള്ളിൽ തന്നെ നിലനിർത്താൻ നിർദേശിക്കുകയായിരുന്നു. ഭാഗ്യവശാൽ എല്ലുകൾക്ക് കേടുപാടുകൾ സംഭവിക്കാത്തതിനാൽ വലിയ ദുരന്തമാണ് ഒഴിവായത്. നിലവിൽ വേദനസംഹാരികൾ കഴിച്ച് വിശ്രമിക്കുന്ന ഇയാൾ, കൂടുതൽ ചികിത്സയ്ക്കായി മറ്റൊരു വിദഗ്ധ അഭിപ്രായം തേടാനും തനിക്കുണ്ടായ ഗുരുതരമായ പരിക്കുകൾക്ക് സർക്കാരിൽ നിന്ന് നഷ്ടപരിഹാരം ഈടാക്കാനും ഒരുങ്ങുകയാണ്.
