ക്യൂബെക്: ഐഎസിൽ ചേരാനായി സിറിയയിലെത്തി തീവ്രവാദിയെ വിവാഹം ചെയ്തെന്ന് ക്യൂബെക് സ്വദേശിനി കുറ്റസമ്മതം നടത്തി. ഭീകര സംഘടനയെ പിന്തുണച്ചതിനും അതിൻ്റെ അനുയായികളിൽ ഒരാളെ വിവാഹം കഴിച്ചതിനുമാണ് 29 കാരിയായ ഔമൈമ ചൗയി കുറ്റ സമ്മതം നടത്തിയത്.
ഐഎസ് പോരാളിയെ വിവാഹം കഴിച്ചുകൊണ്ട് ഒരു തീവ്രവാദ ഗ്രൂപ്പിന് പിന്തുണ നൽകിയതിന് കാനഡയിൽ ശിക്ഷിക്കപ്പെട്ട ആദ്യത്തെ വ്യക്തിയാണ് ചൗവേ എന്ന് ഫെഡറൽ പ്രോസിക്യൂട്ടർമാർ പറഞ്ഞു. വിചാരണയ്ക്ക് മുമ്പുള്ള തടങ്കലിൽ കഴിഞ്ഞ 110 ദിവസങ്ങൾക്ക് പുറമേ ഒരു ദിവസം കൂടി അവർ കസ്റ്റഡിയിൽ കഴിയുകയും മൂന്ന് വർഷത്തേക്ക് പ്രൊബേഷനിൽ കഴിയുകയും ചെയ്യും. കുറ്റസമ്മതം നടത്തിയതിൻ്റെ ഭാഗമായി, തീവ്രവാദവുമായി ബന്ധപ്പെട്ട മറ്റ് മൂന്ന് കുറ്റങ്ങൾ സ്റ്റേ ചെയ്തു.
ചൗയി കുറ്റകൃത്യങ്ങൾ ആവർത്തിക്കാനുള്ള സാധ്യതയില്ലെന്നും അവർ അപകടകാരിയല്ലെന്നുമുള്ള വിലയിരുത്തലിലാണ് കഴിഞ്ഞ 30 മാസത്തിനിടെ അവരെ ചോദ്യം ചെയ്ത പബ്ലിക് പ്രോസിക്യൂഷൻ സർവീസ് എത്തിയത്. ആർ‌സി‌എം‌പിയും അതേ വിലയിരുത്തലാണ് പങ്കുവെച്ചത്. ചൗയി പോരാട്ടങ്ങളിലോ മറ്റ് അക്രമ പ്രവർത്തനങ്ങളിലോ നേരിട്ട് പങ്കെടുത്തതായി അറിവില്ല. 2022 ഒക്ടോബറിൽ സിറിയയിലെ ഒരു തടങ്കൽപ്പാളയത്തിൽ നിന്നാണ് അവർ കാനഡയിലേക്ക് മടങ്ങിയത്. 2023 ജനുവരിയിൽ അവരെ കർശന ജാമ്യത്തിൽ വിട്ടയച്ചു, തീവ്ര ആശയങ്ങളിൽ നിന്ന് മാറുന്നതിനായി അവർ തെറാപ്പിയിൽ പങ്കെടുത്ത് വരികയാണ്.
