എംപി സ്ഥാനം ജനുവരി 9 ന് ഔദ്യോഗികമായി രാജിവെക്കുമെന്ന് പ്രഖ്യാപിച്ച് മുൻ കനേഡിയൻ ഉപപ്രധാനമന്ത്രിയും പ്രമുഖ ലിബറൽ നേതാവുമായ ക്രിസ്റ്റിയ ഫ്രീലാൻഡ്. യുക്രെയ്ൻ പ്രസിഡന്റ് വോളോഡിമിർ സെലൻസ്കിയുടെ സാമ്പത്തിക ഉപദേഷ്ടാവായി നിയമിതയായതിന് പിന്നാലെയാണ് രാജി. ഒരു വിദേശ രാജ്യത്തിന്റെ ഉപദേശക പദവി സ്വീകരിച്ചിട്ടും കാനഡയിലെ എംപി സ്ഥാനത്ത് തുടരുന്നതായുള്ള പ്രതിപക്ഷത്തിന്റെ വിമർശനങ്ങളെത്തുടർന്നാണ് ഫ്രീലാൻഡ് തന്റെ പടിയിറക്കം വേഗത്തിലാക്കിയത്.
2013 മുതൽ പാർലമെന്റംഗമായി സേവനമനുഷ്ഠിക്കുന്ന ഫ്രീലാൻഡ്, വരും മാസങ്ങളിൽ ലണ്ടൻ ആസ്ഥാനമായുള്ള ‘റോഡ്സ് ട്രസ്റ്റ്’ എന്ന വിദ്യാഭ്യാസ ചാരിറ്റിയുടെ സിഇഒ ആയി ചുമതലയേൽക്കും. ഫ്രീലാൻഡ് രാജിവെക്കുന്നതോടെ, ടൊറന്റോയിലെ ലിബറൽ കോട്ടയായ യൂണിവേഴ്സിറ്റി-റോസ്ഡെയ്ൽ മണ്ഡലത്തിൽ ഉടൻ തന്നെ ഉപതിരഞ്ഞെടുപ്പ് നടക്കും. മറ്റ് മുതിർന്ന ലിബറൽ നേതാക്കളും വരും ദിവസങ്ങളിൽ സമാനമായ രീതിയിൽ സ്ഥാനമൊഴിഞ്ഞേക്കുമെന്ന സൂചന പ്രധാനമന്ത്രി മാർക്ക് കാർണി പങ്കു വെച്ചിരുന്നു. ഔദ്യോഗിക രാഷ്ട്രീയത്തിൽ നിന്ന് വിരമിച്ചാലും യുക്രെയ്ന്റെ പുനർനിർമ്മാണത്തിനും കാനഡയുടെ വികസനത്തിനുമായി തന്റെ പിന്തുണ തുടരുമെന്ന് ഫ്രീലാൻഡ് പ്രസ്താവനയിൽ അറിയിച്ചു.
