യുഎസ് പ്രസിഡന്റ് ഡോണള്ഡ് ട്രംപിനെതിരായ തന്റെ പോസ്റ്റുകളില് ഖേദം പ്രകടിപ്പിച്ച് ഇലോണ് മസ്ക് രംഗത്തെത്തുന്നതിനു മുന്പ് ഇരുവരും ഫോണില് സംസാരിച്ചതായി റിപ്പോര്ട്ടുകള്. ഡോണള്ഡ് ട്രംപിനെ ഇലോണ് മസ്ക് ഫോണില് വിളിച്ച് സംസാരിച്ചെന്ന് വൈറ്റ് ഹൗസിലെ പേര് വെളിപ്പെടുത്താത്ത വ്യക്തിയെ ഉദ്ധരിച്ച് ന്യൂയോര്ക്ക് ടൈംസ് റിപ്പോര്ട്ടു ചെയ്തു.
അതേസമയം, തന്റെ പോസ്റ്റുകളില് ഖേദം പ്രകടിപ്പിച്ച ഇലോണ് മസ്കിന്റെ നടപടിയെ ഡോണള്ഡ് ട്രംപ് അഭിനന്ദിച്ചു. ഇലോണ് മസ്കിന്റെ കമ്പനികള്ക്ക് യുഎസ് സര്ക്കാര് നല്കിയിട്ടുള്ള കരാറുകള് പുനഃപരിശോധിക്കാന് ശ്രമം നടത്തിയിട്ടില്ലെന്ന് വൈറ്റ് ഹൗസ് പ്രസ് സെക്രട്ടറി കരോലിന് ലീവിറ്റ് വ്യക്തമാക്കി.
പ്രസിഡന്റ് ഡോണള്ഡ് ട്രംപിനെക്കുറിച്ചുള്ള കഴിഞ്ഞ ആഴ്ചയിലെ തന്റെ ചില പോസ്റ്റുകളില് ഖേദമുണ്ടെന്നു അത് വല്ലാതെ അതിരുവിട്ടെന്നുമായിരുന്നു ഇലോണ് മസ്ക് എക്സില് കുറിച്ചിരുന്നു. അറപ്പും വെറുപ്പുമുണ്ടാക്കുന്നതാണ് ട്രംപിന്റെ നികുതി ബില്ലെന്നും ഇത് പാസാക്കിയവരെ ജനങ്ങള് കൈകാര്യം ചെയ്യണമെന്നുമുള്ള മസ്കിന്റെ പ്രസ്താവനയാണ് വാക്പോരിന് തിരികൊളുത്തിയത്. രാഷ്ട്രീയ സംഭാവനകള് ഇനി നല്കില്ലെന്നും താനില്ലായിരുന്നുവെങ്കില് ട്രംപ് തിരഞ്ഞെടുപ്പില് തോറ്റേനെയെന്നും മസ്ക് പറഞ്ഞിരുന്നു.
മസ്ക് പറഞ്ഞതിനു ഗുരുതര പ്രത്യാഘാതമുണ്ടാകുമെന്ന് എന്ബിസി ന്യൂസിനു നല്കിയ അഭിമുഖത്തില് ട്രംപ് തിരിച്ചടിക്കുകയും ചെയ്തു. മസ്കിനോട് സംസാരിക്കാന് തനിക്ക് താല്പര്യമില്ലെന്നും മസ്കിന്റെ മാനസിക നില ശരിയല്ലെന്നും പറഞ്ഞ ട്രംപ്, മസ്കിന്റെ കമ്പനികള്ക്ക് യുഎസ് സര്ക്കാര് നല്കിയിട്ടുള്ള കരാറുകള് പുനഃപരിശോധിക്കുമെന്നും മുന്നറിയിപ്പു നല്കി. പിന്നാലെയാണ് സമൂഹമാധ്യമത്തിലൂടെ ഇലോണ് മസ്ക് തന്റെ പോസ്റ്റുകളില് ഖേദം പ്രകടിപ്പിച്ചത്.
