വിഴിഞ്ഞം അന്താരാഷ്ട്ര തുറമുഖത്തുനിന്ന് സംസ്ഥാനത്തിന് അകത്തേക്കും പുറത്തേക്കുമുള്ള കരമാർഗമുള്ള ചരക്കുനീക്കത്തിന് തുടക്കമായി. റോഡ് മാർഗം തുറമുഖത്തേക്ക് എത്തിയ ആദ്യ കണ്ടെയ്‌നർ പ്രതിപക്ഷ നേതാവ് വി.ഡി. സതീശൻ ഫ്ലാഗ് ഓഫ് ചെയ്തപ്പോൾ, പദ്ധതിയുടെ ഔദ്യോഗിക ഉദ്ഘാടനം മുഖ്യമന്ത്രി നിർവഹിച്ചു. ഇതുവരെ അന്താരാഷ്ട്ര കപ്പലുകൾക്കിടയിൽ ചരക്കുകൾ മാറ്റിക്കയറ്റുന്ന ട്രാൻസ്ഷിപ്മെന്റ് ഹബ്ബായി മാത്രം പ്രവർത്തിച്ചിരുന്ന തുറമുഖത്ത്, ഇനിമുതൽ റോഡ് വഴി നേരിട്ട് ഉൽപന്നങ്ങൾ എത്തിക്കാനും കയറ്റി അയക്കാനും സാധിക്കും. പദ്ധതിയുടെ ഭാഗമായി നിലമേൽ പ്രവർത്തിക്കുന്ന ഭക്ഷ്യകമ്പനിയുടെ കണ്ടെയ്‌നർ സ്‌പെയിനിലെ വലൻസിയയിലേക്കും, ആസ്പിൻവാൾ കമ്പനിയുടെ ഇഡ്ഡലി, സാമ്പാർ, പഴംപൊരി, ഇലയട തുടങ്ങിയ വിഭവങ്ങൾ കടൽമാർഗവും ഇന്ന് അയച്ചു. ഇതോടൊപ്പം സംസ്ഥാന സർക്കാരിന്റെ ‘മിഷൻ സമുദ്ര’ ലോജിസ്റ്റിക്സ് പദ്ധതി പ്രഖ്യാപിക്കുകയും ചെയ്തു.
കഴിഞ്ഞ ഒരു പതിറ്റാണ്ടായി തുറമുഖത്തിന്റെ റോഡ്, റെയിൽ ബന്ധിപ്പിക്കൽ നടപടികൾ വൈകിയതാണ് കൂടുതൽ നേട്ടങ്ങൾ കൈവരിക്കുന്നതിന് തടസ്സമായതെന്ന് മുഖ്യമന്ത്രി വിമർശിച്ചു. നിലവിലെ സർക്കാർ അധികാരത്തിൽ വന്ന ശേഷമാണ് ഈ പ്രവർത്തനങ്ങൾ വേഗത്തിലാക്കിയതെന്നും, തുറമുഖ വികസനത്തിനായി കൂടുതൽ സ്ഥലം ഏറ്റെടുക്കാൻ നിർദേശം നൽകിയിട്ടുണ്ടെന്നും അദ്ദേഹം വ്യക്തമാക്കി. ഇതിനുപുറമേ, കൊച്ചിൻ പോർട്ടിൽ പുതിയ ക്രൂസ് ടെർമിനൽ ആരംഭിച്ച് കൊച്ചിയിൽ നിന്ന് ഗോവ, ദുബായ് എന്നിവിടങ്ങളിലേക്കും, കാസർകോട് മുതൽ തിരുവനന്തപുരം വരെയും യാത്രക്കപ്പലുകൾ സർവീസ് നടത്തുമെന്നും അദ്ദേഹം അറിയിച്ചു. സംസ്ഥാനത്തെ 44 നദികളും കായലുകളും തടാകങ്ങളും കോർത്തിണക്കി വിപുലമായ ജലടൂറിസം വികസനമാണ് ഇതിലൂടെ സർക്കാർ ലക്ഷ്യമിടുന്നത്.
അതേസമയം, രാഷ്ട്രീയ തർക്കങ്ങളെ തുടർന്ന് ബിജെപി നേതാക്കളും കേന്ദ്രമന്ത്രിയും ചടങ്ങിൽ നിന്ന് വിട്ടുനിന്നു. മുഖ്യാതിഥിയാകേണ്ടിയിരുന്ന കേന്ദ്ര ഷിപ്പിങ് മന്ത്രി സർബാനന്ദ സോനോവാൾ, മേയർ വി.വി. രാജേഷ്, ബിജെപി സംസ്ഥാന അധ്യക്ഷൻ രാജീവ് ചന്ദ്രശേഖർ എന്നിവരാണ് പരിപാടി ബഹിഷ്‌കരിച്ചത്. മുൻപ് മുഖ്യമന്ത്രി ഡൽഹിയിൽ നേരിട്ടെത്തി പ്രധാനമന്ത്രിയോട് സഹകരണം തേടിയ ശേഷവും ഇത്തരത്തിലുള്ള നിലപാടുകൾ സ്വീകരിക്കുന്നതിൽ കേന്ദ്രസർക്കാരിന് കടുത്ത അമർഷമുണ്ടെന്ന് ബിജെപി നേതൃത്വം വ്യക്തമാക്കി.
