രാജ്യത്തുടനീളമുള്ള വീടുകളിൽ ഊർജക്ഷമത വർധിപ്പിക്കാനും പരമ്പരാഗത ഇന്ധന അധിഷ്ഠിത ഹീറ്റിങ് സംവിധാനങ്ങൾ മാറ്റിസ്ഥാപിക്കാനും പുതിയ ‘ഹീറ്റ് പമ്പ് റീബേറ്റ്’ (heat pump rebate) പദ്ധതി ആരംഭിക്കുമെന്ന് പ്രധാനമന്ത്രി മാർക്ക് കാർണി പ്രഖ്യാപിച്ചു. എട്ട് വർഷത്തിനുള്ളിൽ പത്ത് ലക്ഷം വീടുകളിൽ നവീകരണ പ്രവർത്തനങ്ങൾ (retrofitting) നടത്തുക എന്ന ലക്ഷ്യത്തോടെ 2 ബില്യൺ ഡോളർ വകയിരുത്താനാണ് സർക്കാർ പദ്ധതിയിടുന്നത്.
കുറഞ്ഞതും ഇടത്തരം വരുമാനമുള്ള കുടുംബങ്ങൾക്കാണ് പദ്ധതിയിലൂടെ പ്രയോജനം ലഭിക്കുക. പഴയ ഗ്യാസ്, എണ്ണ അധിഷ്ഠിത ഹീറ്റിങ് സംവിധാനങ്ങൾക്ക് പകരം ഹീറ്റ് പമ്പുകൾ സ്ഥാപിക്കുന്നതിനുള്ള ചെലവ് സർക്കാർ വഹിക്കുമെന്ന് അധികൃതർ അറിയിച്ചു. പാവപ്പെട്ട കുടുംബങ്ങൾക്ക് ഹീറ്റ് പമ്പ് വാങ്ങുമ്പോൾ 10,000 ഡോളർ വരെ തിരികെ ലഭിക്കും. അതേസമയം, മറ്റ് വീട്ടുടമസ്ഥർക്ക് ഹീറ്റ് പമ്പിലേക്ക് മാറുന്നതിലൂടെ 2,000 ഡോളർ ലഭിക്കുമെന്നും അധികൃതർ വ്യക്തമാക്കി. വീടുകളിലെ ഊർജ ഉപഭോഗം കുറയ്ക്കുന്നതിനൊപ്പം ഹരിതഗൃഹ വാതക ഉദ്‌വമന നിയന്ത്രണവും പദ്ധതിയിലൂടെ ലക്ഷ്യമിടുന്നു.
