പ്രധാനമന്ത്രി യൂലിയ സ്വിരിഡെങ്കോ സ്ഥാനമൊഴിഞ്ഞതിനെത്തുടർന്ന് യുക്രെയ്നിൽ മന്ത്രിസഭ ഒന്നടങ്കം രാജിവെച്ചു. പുതിയ രാഷ്ട്രീയ തന്ത്രങ്ങൾ നടപ്പിലാക്കുന്നതിന്റെ ഭാഗമായാണ് ഭരണമാറ്റമെന്ന് പ്രസിഡൻ്റ് വ്ലോദിമിർ സെലെൻസ്കി അറിയിച്ചു. സ്ഥാനമൊഴിഞ്ഞ പ്രധാനമന്ത്രിക്ക് അന്താരാഷ്ട്ര ബന്ധങ്ങൾ ശക്തിപ്പെടുത്തുന്നതിനുള്ള പുതിയ ചുമതല നൽകും. എന്നാൽ, പുതിയ പ്രധാനമന്ത്രി ആരെന്നതിൽ ഔദ്യോഗിക സ്ഥിരീകരണമുണ്ടായിട്ടില്ല.
രാജ്യത്തെ വലിയ അഴിമതി വിവാദമായ ‘മിഡാസ് കേസി’ന്റെയും മറ്റ് സാമ്പത്തിക ആരോപണങ്ങളുടെയും പശ്ചാത്തലത്തിലാണ് ഭരണതലത്തിലെ ഈ അഴിച്ചുപണി. ഉയർന്ന തലത്തിലുള്ള അഴിമതികളെ നേരിടാൻ തങ്ങൾക്ക് കഴിയുമെന്ന് തെളിയിക്കുകയാണ് സർക്കാർ ലക്ഷ്യമിടുന്നത്. പ്രധാനമന്ത്രിക്ക് പുറമെ നിയമപാലന ഏജൻസികളുടെ തലപ്പത്തും വരുംദിവസങ്ങളിൽ മാറ്റങ്ങൾ ഉണ്ടാകുമെന്ന് സെലെൻസ്കി സൂചന നൽകി.
പുതിയ പ്രധാനമന്ത്രി സ്ഥാനത്തേക്ക് ഊർജ മന്ത്രി ഡെനിസ് ഷിമിഹാൽ, പ്രതിരോധ മന്ത്രി മിഖായ്ലോ ഫെഡോറോവ്, നാഫ്റ്റോഗാസ് മേധാവി സെർഹി കൊറെറ്റ്സ്കി എന്നിവരുടെ പേരുകളാണ് സജീവമായി ഉയർന്നു കേൾക്കുന്നത്. ഇതിൽ കൊറെറ്റ്സ്കിക്ക് സാധ്യതയേറെയാണെന്നാണ് രാഷ്ട്രീയ നിരീക്ഷകരുടെ വിലയിരുത്തൽ. പാർലമെൻ്റിന്റെ അംഗീകാരം ലഭിക്കുന്ന മുറയ്ക്ക് അടിയന്തരമായി പുതിയ സർക്കാർ രൂപീകരിക്കാനാണ് പ്രസിഡൻ്റിന്റെ നീക്കം.
