പകൽ വെളിച്ചം മാറി ആകാശം പെട്ടെന്ന് ഇരുളിലേക്ക് പോകുന്ന അപൂർവ ആകാശ പ്രതിഭാസത്തിന് ലോകം ഇന്ന് സാക്ഷ്യം വഹിക്കുകയാണ്. ചന്ദ്രൻ സൂര്യനെ പൂർണമായി മറയ്ക്കുന്ന പൂർണ സൂര്യഗ്രഹണമാണ് (Total Solar Eclipse) ഓഗസ്റ്റ് 12ന് നടക്കുന്നത്. യൂറോപ്പ്, ഗ്രീൻലൻഡ്, ഐസ്‌ലൻഡ്, വടക്കുപടിഞ്ഞാറൻ ആഫ്രിക്ക, വടക്കേ അമേരിക്ക എന്നിവിടങ്ങളിൽ പൂർണ്ണമായോ ഭാഗികമായോ ഈ ഗ്രഹണം ദൃശ്യമാകും.

ഗ്രഹണ സമയത്ത് ഇന്ത്യയിൽ രാത്രിയായതിനാൽ രാജ്യത്ത് ഇത് നേരിട്ട് ദൃശ്യമാകില്ല. ഇന്ത്യൻ സ്റ്റാൻഡേർഡ് സമയം (IST) അനുസരിച്ച് രാത്രി 9.04-ഓടെ ഗ്രഹണ ഘട്ടങ്ങൾക്ക് തുടക്കമാവുകയും ഓഗസ്റ്റ് 13 പുലർച്ചെയോടെ അവസാനിക്കുകയും ചെയ്യും.

ഗ്രഹണം കാണാൻ കഴിയുന്ന സ്ഥലങ്ങൾ

വടക്കൻ റഷ്യയിലെ വിജനമായ മേഖലകളിൽ നിന്നാണ് ഗ്രഹണം ആദ്യം ദൃശ്യമാകുന്നത്. തുടർന്ന് ചന്ദ്രന്റെ നിഴൽ സഞ്ചരിക്കുന്ന ‘പാത്ത് ഓഫ് ടോട്ടാലിറ്റി’ ഗ്രീൻലൻഡ്, ഐസ്‌ലൻഡ്, സ്പെയ്ൻ, പോർച്ചുഗലിന്റെ വടക്കുകിഴക്കൻ ഭാഗങ്ങൾ എന്നിവയിലൂടെ കടന്നുപോകും. സ്പെയിനിൽ വടക്കൻ നഗരമായ ഓവീഡോ മുതൽ മയോർക്ക ദ്വീപ് വരെ ഇത് കാണാനാകും. സ്പെയിനിൽ സൂര്യാസ്തമയത്തിന് തൊട്ടുമുമ്പ് രണ്ട് മിനിറ്റിൽ താഴെ സമയമേ പൂർണ്ണ ഗ്രഹണം നീണ്ടുനിൽക്കൂ. റഷ്യ, ഗ്രീൻലാൻഡ് എന്നിവിടങ്ങളിൽ ഇത് പരമാവധി രണ്ടര മിനിറ്റ് വരെ നീളാം. ഭാഗിക ഗ്രഹണ ഘട്ടം ഏകദേശം 1 മണിക്കൂർ 45 മിനിറ്റ് വരെ നീണ്ടുനിൽക്കും.

തത്സമയ സംപ്രേഷണം (Live Streaming)

ഗ്രഹണം നേരിട്ട് കാണാൻ സാധിക്കാത്തവർക്കായി രാജ്യാന്തര ബഹിരാകാശ ഏജൻസികൾ തത്സമയ സംപ്രേഷണം ഒരുക്കിയിട്ടുണ്ട്:

നാസ (NASA): സൂര്യഗ്രഹണത്തിന്റെ ശാസ്ത്രീയ വശങ്ങളും തത്സമയ ദൃശ്യങ്ങളും ഉൾപ്പെടുത്തി പ്രത്യേക സ്ട്രീമിങ് നടത്തുന്നു.

യൂറോപ്യൻ സ്പേസ് ഏജൻസി (ESA): സ്പെയിനിലെ ജവലാമ്പ്ര ഒബ്‌സർവേറ്ററിയിൽ നിന്നുള്ള തത്സമയ ദൃശ്യങ്ങളും ജ്യോതിശാസ്ത്രജ്ഞരുടെ ചർച്ചകളും സ്ട്രീം ചെയ്യുന്നു.

റോയൽ ഒബ്സർവേറ്ററി ഗ്രീൻവിച്ച്: ലണ്ടൻ നഗരത്തിന് മുകളിൽ ദൃശ്യമാകുന്ന ഭാഗിക സൂര്യഗ്രഹണത്തിന്റെ തത്സമയ ദൃശ്യങ്ങൾ സംപ്രേഷണം ചെയ്യുന്നു.

സുരക്ഷാ മുൻകരുതലുകൾ

സൂര്യഗ്രഹണം നേരിട്ട് കാണുന്നത് കണ്ണിന് ഗുരുതരമായ കാഴ്ചവൈകല്യങ്ങൾ ഉണ്ടാക്കും. അതിനാൽ അംഗീകൃത ഐഎസ്ഒ സാക്ഷ്യപ്പെടുത്തിയ എക്ലിപ്സ് ഗ്ലാസുകൾ മാത്രം ഉപയോഗിക്കുക. സാധാരണ സൺഗ്ലാസുകളോ, സോളാർ ഫിൽട്ടറുകൾ ഇല്ലാത്ത ക്യാമറകൾ, ബൈനോക്കുലറുകൾ, ടെലിസ്‌കോപ്പുകൾ എന്നിവയോ ഉപയോഗിച്ച് സൂര്യനെ നോക്കരുത്.

രാത്രിയിലെ അപൂർവ്വ വിസ്മയം: പെഴ്‌സീഡ് ഉൾക്കാവർഷം

ഗ്രഹണത്തിന് തൊട്ടുപിന്നാലെ ഓഗസ്റ്റ് 12 രാത്രിയെ കൂടുതൽ ആകർഷകമാക്കുന്നത് പെഴ്‌സീഡ് ഉൾക്കാവർഷവും കൂടിയാണ്. കറുത്തവാവ് ദിനമായതിനാൽ ഇരുണ്ട ആകാശം ഉൾക്കാവർഷത്തിന്റെ ദൃശ്യചാരുത വർദ്ധിപ്പിക്കും. മണിക്കൂറിൽ 50 മുതൽ 100 ഉൾക്കകൾ വരെ ഈ പ്രവാഹത്തിൽ കാണാറുണ്ട്. വടക്കു കിഴക്കൻ മാനത്ത് ഉദിക്കുന്ന പെഴ്‌സ്യൂസ് നക്ഷത്ര ഗണത്തിന്റെ പശ്ചാത്തലത്തിലാണ് ഇത് പ്രത്യക്ഷപ്പെടുക.

പ്രകാശ് മലിനീകരണം കുറവുള്ള ഗ്രാമീണ മേഖലകളിൽ ടെറസ്സോ തുറസ്സായ മൈതാനങ്ങളോ കേന്ദ്രീകരിച്ച് ഉൾക്കാവർഷം കൂടുതൽ വ്യക്തമായി നിരീക്ഷിക്കാനാകും.