നോർത്തേൺ ആൽബർട്ട നഗരമായ ഗ്രാൻഡ് പ്രയറിയിൽ വാഹനമോഷണം വർധിക്കുന്നതായി റിപ്പോർട്ട്. ഈ വർഷം ജനുവരി മുതൽ ഫെബ്രുവരി ആദ്യവാരം വരെയുള്ള കണക്കുകൾ പ്രകാരം കഴിഞ്ഞ വർഷത്തെ അപേക്ഷിച്ച് വാഹനമോഷണത്തിൽ 47% വർധനയാണ് രേഖപ്പെടുത്തിയത്. ഇതിൽ തന്നെ പിക്അപ്പ് ട്രക്കുകളെയാണ് വാഹനമോഷ്ടാക്കൾ ലക്ഷ്യമിടുന്നത്. ജനുവരി 1 മുതൽ ഫെബ്രുവരി 9 വരെയുള്ള കാലയളവിൽ മാത്രം 28 വാഹനമോഷണ കേസുകളാണ് റിപ്പോർട്ട് ചെയ്തത്.
വെറും അഞ്ച് വർഷത്തിനിടെ നഗരത്തിലെ കുറ്റകൃത്യങ്ങളുടെ എണ്ണത്തിൽ വലിയ വർധനവുണ്ടായതായാണ് താമസക്കാരുടെ പരാതി. റോയൽ കനേഡിയൻ മൗണ്ടഡ് പോലീസ് (RCMP) പുറത്തുവിട്ട റിപ്പോർട്ട് അനുസരിച്ച്, മോഷ്ടിക്കപ്പെടുന്ന വാഹനങ്ങളിൽ 70 ശതമാനവും പിക്അപ്പ് ട്രക്കുകളാണ്. തണുപ്പുകാലത്ത് എഞ്ചിൻ ചൂടാക്കാനായി സ്റ്റാർട്ട് ചെയ്ത് വെക്കുന്നതും, വാതിലുകൾ ലോക്ക് ചെയ്യാതെ പോകുന്നതുമാണ് മോഷണങ്ങൾ വർധിക്കാൻ പ്രധാന കാരണമെന്ന് പോലീസ് ചൂണ്ടിക്കാട്ടുന്നു.
