കഴിഞ്ഞ രണ്ട് വർഷമായി അമേരിക്കയിലുടനീളം അക്രമ സംഭവങ്ങളിൽ ചരിത്രപരമായ കുറവാണ് രേഖപ്പെടുത്തുന്നത്. ഇതിനുള്ള കൃത്യമായ കാരണം കണ്ടെത്താൻ കുറ്റകൃത്യങ്ങളെക്കുറിച്ച് പഠിക്കുന്ന വിദഗ്ധർ (criminologists) ശ്രമിക്കുമ്പോൾ, ഓസെമ്പിക് (Ozempic), വെഗോവി (Wegovy) തുടങ്ങിയ പുതിയ ഭാരം കുറയ്ക്കൽ മരുന്നുകൾ (GLP-1s) ഇതിന് ഭാഗികമായി കാരണമായിട്ടുണ്ടാകാം എന്ന പുതിയൊരു സിദ്ധാന്തമാണ് റട്‌ഗേഴ്‌സ് സർവകലാശാലയിലെ സോഷ്യോളജി പ്രൊഫസറായ ഡാനിയൽ സെമെൻസയുടെ പഠനം മുന്നോട്ടുവെക്കുന്നത്. GLP-1 മരുന്നുകൾ, വ്യക്തികളുടെ പെട്ടെന്നുള്ള വൈകാരികമായ പ്രതികരണങ്ങൾ (impulsivity), അക്രമവാസന എന്നിവ തമ്മിലുള്ള ബന്ധത്തെക്കുറിച്ചാണ് അദ്ദേഹം പഠനം നടത്തിയത്. ഈ മരുന്നുകൾ മസ്തിഷ്കത്തിലെ റിവാർഡ് പ്രൊസസിംഗിനെയും വ്യക്തിനിയന്ത്രണത്തെയും (self-regulation) സ്വാധീനിക്കുന്നുണ്ടെന്നാണ് ലഭിക്കുന്ന സൂചനകൾ.
നിലവിൽ ഈ മരുന്നുകൾ കഴിക്കുന്നവരിൽ, അക്രമത്തിലേക്ക് നയിക്കാൻ സാധ്യതയുള്ള പ്രധാന ഘടകങ്ങളായ അനിയന്ത്രിതമായ പ്രേരണകളും മദ്യപാനവും ഗണ്യമായി കുറവാണെന്ന് പഠനത്തിൽ വ്യക്തമായി. മസ്തിഷ്കത്തിലെ റിവാർഡ് സിസ്റ്റത്തെ സ്വാധീനിക്കാനുള്ള മരുന്നിന്റെ ശേഷി കാരണം മദ്യപിക്കാനുള്ള ആഗ്രഹവും ഉപയോഗവും കുറയുന്നു. മദ്യപാനം കൂടുതൽ അക്രമാസക്തമായ പെരുമാറ്റത്തിലേക്ക് നയിക്കാറുണ്ടെങ്കിലും, ഈ മരുന്നുകൾ ഉപയോഗിക്കുന്നവരിൽ ആ ബന്ധം വളരെ ദുർബലമാണെന്ന് സെമെൻസ ചൂണ്ടിക്കാട്ടുന്നു. നിലവിൽ അമേരിക്കയിലെ മുതിർന്ന ജനസംഖ്യയുടെ 15% ആളുകൾ ഈ മരുന്നുകൾ ഉപയോഗിക്കുന്നുണ്ടെന്നാണ് കണക്ക്. മരുന്ന് കഴിക്കുന്നത് നിർത്തിയാൽ ഇതിന്റെ ഗുണഫലങ്ങൾ കുറയുമെങ്കിലും, ദശലക്ഷക്കണക്കിന് ആളുകളിൽ ഇത് ആത്മനിയന്ത്രണം സൃഷ്ടിക്കുന്നുണ്ട്.
എന്നിരുന്നാലും, ഈ മരുന്നുകളും കുറ്റകൃത്യങ്ങൾ കുറയുന്നതും തമ്മിൽ നേരിട്ടുള്ള ബന്ധമുണ്ടെന്ന് പറയാറായിട്ടില്ലെന്നും ഇതിന്റെ ദീർഘകാല ഫലങ്ങളെക്കുറിച്ചുള്ള പഠനങ്ങൾ ഇപ്പോഴും പ്രാരംഭ ഘട്ടത്തിലാണെന്നും സെമെൻസ വ്യക്തമാക്കുന്നു. വ്യക്തികളെ ദീർഘകാലം നിരീക്ഷിച്ച് മരുന്ന് ഉപയോഗത്തിന് മുൻപും ശേഷവുമുള്ള മാറ്റങ്ങൾ മനസ്സിലാക്കിയാൽ മാത്രമേ ഭാവിയിൽ കുറ്റകൃത്യങ്ങൾ തടയുന്നതിൽ ഈ മരുന്നുകളുടെ കൃത്യമായ പങ്ക് വ്യക്തമാകൂ. രാജ്യത്ത് കുറ്റകൃത്യങ്ങൾ കുറയുന്നതിന് പിന്നിലുള്ള സങ്കീർണ്ണമായ മറ്റു പല കാരണങ്ങളിൽ ഒന്നു മാത്രമായിരിക്കാം ഇതിന്റെ ഉപഫലങ്ങൾ (secondary effects).
അമേരിക്കയിൽ സമീപകാല ചരിത്രത്തിലെ ഏറ്റവും ഉയർന്ന നിരക്കിലാണ് അക്രമ സംഭവങ്ങൾ കുറയുന്നത്. 2025-ൽ യു.എസിലെ അക്രമ കുറ്റകൃത്യങ്ങളുടെ നിരക്ക് 9.7% ഇടിഞ്ഞു, ഇത് കഴിഞ്ഞ 90 വർഷത്തിനിടയിലെ ഏറ്റവും വലിയ വാർഷിക കുറവാണ്. കൊവിഡ് കാലത്ത് ഉയർന്ന മദ്യപാനം, ലഹരിമരുന്ന് ഉപയോഗം, തോക്ക് വിൽപ്പന എന്നിവ സാധാരണ നിലയിലായതാണ് ഇതി പ്രധാന കാരണമായി വിദഗ്ധർ ചൂണ്ടിക്കാണിക്കുന്നത്. കൂടാതെ, കുറ്റകൃത്യങ്ങളിൽ ഏർപ്പെടാൻ സാധ്യതയുള്ള ചെറുപ്പക്കാരുടെ എണ്ണത്തിൽ ഉണ്ടായ കുറവും, എ.ഐ (AI) ഉപകരണങ്ങളും പ്രെഡിക്റ്റീവ് അനലിറ്റിക്സും ഉപയോഗിച്ചുള്ള പൊലീസിന്റെ കാര്യക്ഷമമായ ഇടപെടലുകളും കുറ്റകൃത്യങ്ങൾ കുറയ്ക്കുന്നതിൽ വലിയ പങ്കുവഹിച്ചിട്ടുണ്ട്.
