കാനഡയിലെ തൊഴിലാളികളുടെ ശരാശരി പ്രായം വർധിക്കുന്നതായി സ്റ്റാറ്റിസ്റ്റിക്സ് കാനഡയുടെ പുതിയ പഠനം. കഴിഞ്ഞ രണ്ട് പതിറ്റാണ്ടിനിടെ കാനഡയിലെ തൊഴിലാളികളുടെ ശരാശരി പ്രായം 37.5-ൽ നിന്ന് 41.7 ആയി ഉയർന്നു. 55 വയസ്സോ അതിൽ കൂടുതലോ പ്രായമുള്ള ജീവനക്കാരുടെ എണ്ണം ഇരട്ടിയായി. ചരിത്രത്തിലാദ്യമായി കാനഡയിൽ 18 വയസ്സിന് താഴെയുള്ള കുട്ടികളേക്കാൾ കൂടുതൽ 65 വയസ്സിന് മുകളിലുള്ള മുതിർന്നവരുണ്ടെന്നും പഠനത്തിൽ പറയുന്നു.
കഠിനമായ ശാരീരിക അധ്വാനം ആവശ്യമുള്ള ഉത്പാദന മേഖലയിലാണ് പ്രായമായ തൊഴിലാളികളുടെ എണ്ണം ഏറ്റവും കൂടുതലുള്ളത്. സാങ്കേതികവിദ്യയുടെ വളർച്ച കാരണം ശാരീരിക അധ്വാനം കുറഞ്ഞതാണ് ഇതിന് കാരണം. കൂടാതെ രാജ്യം ‘നോളജ് എക്കോണമിയിൽ നിന്ന് വിസ്ഡം എക്കോണമിയിലേക്ക് മാറിക്കൊണ്ടിരിക്കുകയാണെന്നും ഏജൻസി റിപ്പോർട്ട് ചെയ്തു. പ്രതിസന്ധികളെ വിവേകത്തോടെ നേരിടാനും, കൃത്യമായ തീരുമാനങ്ങൾ എടുക്കാനുമുള്ള പരിചയസമ്പന്നരുടെ കഴിവിനാണ് ഇപ്പോൾ കമ്പനികൾ മുൻഗണന നൽകുന്നതെന്ന് ഫെഡറൽ ഏജൻസി ചൂണ്ടിക്കാട്ടി. മുതിർന്ന ജീവനക്കാരുടെ വർഷങ്ങളായുള്ള പ്രവൃത്തിപരിചയവും ശരിയായ തീരുമാനങ്ങൾ എടുക്കാനുള്ള കഴിവും കാരണം കമ്പനികൾ അവരെ ജോലിയിൽ നിലനിർത്താൻ താല്പര്യപ്പെടുന്നു. കാനഡയിൽ മാത്രമല്ല, ആഗോളതലത്തിൽ തന്നെ ദൃശ്യമാകുന്ന ഒരു മാറ്റമാണിതെന്നും സ്റ്റാറ്റിസ്റ്റിക്സ് കാനഡ റിപ്പോർട്ട് ചെയ്തു.
