ലൊസാഞ്ചലസില്‍ കുടിയേറ്റക്കാരുടെ പ്രക്ഷോഭം അടിച്ചമര്‍ത്താന്‍ നാഷണല്‍ ഗാര്‍ഡിനെ വിന്യസിക്കാനുള്ള തീരുമാനത്തെ ന്യായീകരിച്ച് അമേരിക്കന്‍ പ്രസിഡന്റ് ഡോണള്‍ഡ് ട്രംപ്. തന്റെ ഈ നീക്കം കലാപകാരികള്‍ ലൊസാഞ്ചലസിനെ പൂര്‍ണ്ണമായും നശിപ്പിക്കുന്നത് തടഞ്ഞുവെന്ന് അദ്ദേഹം അവകാശപ്പെട്ടു. കാലിഫോര്‍ണിയ ഗവര്‍ണര്‍ ഗാവിന്‍ ന്യൂസം, ലോസ് ഏഞ്ചല്‍സ് മേയര്‍ കാരെന്‍ ബാസ് എന്നിവരെ പ്രസിഡന്റ് രൂക്ഷമായി വിമര്‍ശിച്ചു.
കഴിവുകെട്ട ഗവര്‍ണര്‍ ഗാവിന്‍ ന്യൂസവും മേയര്‍ കാരെന്‍ ബാസും തന്നോട് നഗരത്തെ വീണ്ടെടുത്ത് തന്നതിന് നന്ദി പറയേണ്ടത്. പകരം, കാലിഫോര്‍ണിയയിലെയും അമേരിക്കയിലെയും ജനങ്ങളോട് ഞങ്ങളെ ആവശ്യമില്ലെന്നും ഇവ ‘സമാധാനപരമായ പ്രതിഷേധങ്ങള്‍’ ആണെന്നും പറഞ്ഞുകൊണ്ട് അവര്‍ കള്ളം പറയാന്‍ തീരുമാനിക്കുകയായിരുന്നുവെന്നും ട്രംപ് പറഞ്ഞു. നമ്മുടെ പൗരന്മാരെ സുരക്ഷിതമായി നിലനിര്‍ത്താന്‍ ആവശ്യമായത് താന്‍ എപ്പോഴും ചെയ്യും, അങ്ങനെ നമുക്ക് ഒരുമിച്ച് അമേരിക്കയെ വീണ്ടും മഹത്തരമാക്കാന്‍ കഴിയുമെന്നും ട്രംപ് കൂട്ടിച്ചേര്‍ത്തു.
ലൊസാഞ്ചലസിലെ കുടിയേറ്റ പ്രതിഷേധങ്ങള്‍ അടിച്ചമര്‍ത്താന്‍ 2,000 നാഷണല്‍ ഗാര്‍ഡ് സൈനികരെ വിന്യസിക്കാന്‍ ട്രംപ് ഉത്തരവിട്ടിരുന്നു. എന്നാല്‍ ഗവര്‍ണര്‍ ഗാവിന്‍ ന്യൂസം ഈ നീക്കം അനാവശ്യമാണെന്ന് പറഞ്ഞിരുന്നു. ഇതിനെതിരെയാണ് ട്രംപ് പരസ്യമായി രംഗത്ത് വന്നത്. ന്യൂസമിന്റെ അറസ്റ്റിനെ പിന്തുണയ്ക്കുമെന്നും ട്രംപ് നിര്‍ദ്ദേശിച്ചിരുന്നു.
